БНСУ-д манай улсын 2 иргэн COVID-19 вирусийн халдвараар өвчилсөн талаарх мэдээлэл тус улсын хэвлэл мэдээллийн хэрэгслээр гарч байна. 

Мөн монголчууд хамгийн их суурьшиж амьдардаг Монголтаун буюу Сөүлийн Түндэмүн орчимд коронавирусийн 16 тохиолдол бүртгэгдээд байгаа ажээ. Эдгээр халдварын тохиолдол нь РС тоглоомын газар болон Дэгү хот дахь Шинчёнжи хэмээх Христийн сүмээс авсан нь тодорхой болоод байна.

Өнөөдрийн байдлаар БНСУ-д коронавирусын 110 тохиолдол шинээр илэрч нийт 7979 хүн халдвартай хэмээн бүртгэгджээ.

Сүүлд нэмэгдсэн тохиолдлуудын дийлэнх хувийг 20-30 насны залуучууд эзэлж байна.

БНСУ-ын Гадаад иргэн, харьяатын газар, ГХЯ-наас тус улсад "СOVID-19"-ийн нөхцөл байдал улам хүндэрч байгаатай холбогдуулан гадаадын иргэдэд чиглэсэн зохицуулалт бүхий арга хэмжээ авч хэрэгжүүлэхээ Сөүл дэх ДТГ-уудад мэдэгдээд байгаа юм.

Үүнд:

- Хууль бусаар оршин сууж буй гадаадын иргэд сайн дураар нутаг буцах өршөөлийн хугацаа болох 2020 оны 6 дугаар сарын 30-ны өдрөөс хойш эрүүл мэндийн байгууллагын хөл хорионд хамрагдаж нутаг буцаж чадаагүй бол тэдгээр иргэнийг эмнэлгийн нотлох бичгийн дагуу өршөөлд хамруулна.

- БНСУ-д хууль бусаар амьдарч байгаа гадаадын иргэд хуулийн байгууллагад саатуулагдахаас болгоомжилж байгаатай холбоотой халдварт өвчний тархалт нэмэгдэх эрсдэл өндөр байна. БНСУ-ын “Гадаадын иргэн, харьяатын тухай хууль”-ийн дагуу БНСУ-д хууль бусаар оршин сууж буй визийн зөрчилтэй гадаадын иргэд эрүүл мэндийн төв, эмнэлэгт хандсан тохиолдолд тухайн иргэний оршин суугаа статусын талаар цагдаагийн байгууллагад мэдээлэхгүй, албадан нутаг буцаах арга хэмжээ авахгүй болно.


-Халдвар авсан гадаадын иргэнтэй холбоотой мэдээллийг холбогдох ЭСЯ-нд шуурхай мэдээлнэ.


-Эрүүл мэндийн олон улсын дүрмийн 40-р заалт болон дотоодын холбогдох хуулийн дагуу коронавирусний халдвар авсан гадаадын иргэдийн эмчилгээний зардлыг Солонгосын тал хариуцна гэсэн байна.


Share