Монгол Улсын нийт экспортын 41 хувийг дангаар бүрдүүлж байгаа нүүрсний орлого коронавирусийн улмаас тасалдсан ч өчигдрөөс эхлэн Замын-Үүд боомтоор нүүрс тээвэрлэсэн автомашинууд БНХАУ руу гарч эхэлсэн билээ.

Харин Өмнөговь аймгийн Гашуунсухайт, Шивээхүрэн боомтоор 3 сарын 15-аас нүүрс экспортлох шийдвэр гараад байна. Энэхүү ажилтай холбогдуулан тус боомтод бэлтгэл хангах болон эрсдэлтэй нүүр тулж ажиллах байцаагчдад зориулан хямд, гарын доорх материалыг ашиглан 1 удаагийн нүүрний хаалт хийсэн байна.

Гэсэн хэдий ч өчигдөр тус боомттой хил залгаа Баяннуур аймагт БНХАУ-ын иргэн коронавирусийн халдварын улмаас нас барсан байна. Энэ нь Өвөрмонголд уг халдвараар нас барсан анхны тохиолдол юм.

Сарын өмнө Ганц модны боомтоос 120 км -ийн цаана орших Ѳвѳрмонголын Баяннуур аймгийн Халиут суманд коронавирус илэрсэн билээ.