Баян-Өлгий аймагт энэ сарын 11-ний өдрийн 22 цаг 30 минутын орчимд шинэ коронавирусийн сэжигтэй нэг тохиолдол бүртгэгджээ. 

Халуурч, бие нь суларсан байдалтай аймгийн нэгдсэн эмнэлэгт тусгаарлагдсан тус иргэн өнгөрсөн нэгдүгээр сарын 10-нд БНХАУ руу зорчиж, хоёрдугаар сарын 6-нд Монголд ирсэн. Өчигдрийн 21.00 цагийн орчимд Ховдоос Баян-Өлгий аймагт очсон өгүүлэмжтэй байна.

Яг одоогийн байдлаар тухайн иргэний биеийн байдал гайгүй, халуунгүй байна. Сорьцын шинжилгээг Улаанбаатар руу явуулсан. Түүнтэй хамт Ховд аймгаас ирсэн 4 хүнийг зохих журмын дагуу тусгаарласан гэж аймгийн Эрүүл мэндийн байгууллагаас мэдээллээ.

Сэжигтэй тохиолдол илэрсэнтэй холбоотойгоор тус аймгийн Онцгой комисс өнгөрсөн шөнийн 03.00 цагаас хуралдаж, дараах шийдвэрүүдийг гаргав.

- Өнөөдрийн 08.00 цагаас эхлэн сэжигтэй тохиолдлын шинжилгээний хариу гартал тус аймгийн зах, худалдааны төвүүдийг хаалаа.

- Баар, ресторан, караоке, сүм, хийдүүдийн үйл ажиллагааг гуравдугаар сарын 02-ныг хүртэл зогсоов.

- Сэжигтэй тохиолдол илэрсэнтэй холбоотойгоор худал мэдээлэл тараахгүй байх, зохиомлоор хомсдол үүсгэж, үнийн хөөрөгдөл бий болгохгүй байхыг анхаарууллаа.

Share