Хэрэглэгчийн зургийг авч 50 нас нэмж харагдуулдаг FaceApp интернетийн шинэ трэнд болоод буй. Гэтэл үүний цаана оросууд байгаа ба хэрэглэгчдийн зурган мэдээллийг цуглуулж байж магадгүй гэж мэргэжилтнүүд таамаглажээ. 2017 онд Санкт Петербург хотод төвтэй Wireless Lab технологийн компанийн бүтээсэн энэхүү апп хэрэглэгчийн зөвшөөрлийн авалгүй санах ойд нэвтэрч зургын санг ашиглах тогтолцоотой аж. Ийм хувийн нууцад халдсан гэж Америкийн технологийн шинжээчид анхаарууллаа.

Дээрх нь жүжигчин Пол Радд, Том Холланд нарын насыг нэмсэн байгаа байдал. Ийм байдлаар бараг хүн бүр л FaceApp -ийг ашиглаж үзсэн. Инстаграмын стори гүйлгэхэд дор хаяж 4, 5 хүн янз бүрээр өөрийгөө хувиргасан байдгийг уншигч та бүхэн ч анзаарсан болов уу. 

FaceApp-аар өөрийн төрхийг өөрчлөхдөө зургийн цомгоосоо сонгож, эсвэл апп доторх камерийн цэсээр зураг авч болдог. Зургаа аваад үсний өнгөө өөрчилж, сахал нэмж, залуухан харагдах ч боломжтой. Тус аппликейшн нь iOS болон Android үйлдлийн системийн хамгийн их татагдсан программ болж "#faceappchallenge" гэх hashtag-тай пост сошиал медиад давалгаалж буй. 

Их Британийн "Digitas" компанийн стратегич Жеймс Ватли өөрийн твиттер хуудастаа "Та бүхэн зургаа постолж, шэйрлэхдээ FaceApp-т насан туршийн, буцаах боломжгүй, ашиглалтын зардалгүйгээр таны бүх төрлийн медиа контентоо хэрэглүүлэх, нийтлүүлэх эрх олгож байгаа хэрэг. FaceApp таны нэр, хэрэглэгчийн нэр, бүх төрлийн зургийг нөхөн олговоргүйгээр ашиглах эрхтэй. Иймд та зургаа интернетээс устгуулж, гомдоллох ямар ч эрхгүй болно." хэмээжээ. 

Хэрэглэгч хэдий аппликейшнээ гар утаснаасаа устгасан ч зургийг тань хадгалж, нөхөн олговор олгохгүйгээр ашиглаж чадна.

Google компанийн Gmail-ийн маркетингийн менежер асан, vpnMentor блогийн аюулгүй байдлын мэргэжилтэн Ариэль Хохштадт иймэрхүү аппликейшний талаар хүмүүст сануулга өгч байсан гэлээ. Тэрбээр MailOnline сайтад өгсөн ярилцлагадаа "Хакерууд интернет хэрэглэгчдийг ямар сайт руу нэвтэрч, юу хийж байгааг нь харж чаддаг ч хэн гэдгийг нь мэддэггүй байсан. Одоо тэд утасны камерыг ашиглан ижил хүйстэн хүмүүст зориулсан сайтаар зочилдог ч хүмүүст үүнийгээ хэлж чаддаггүй залуухан ижил хүйстэн охиныг бичиж тагнаж байна гээд боддоо." гэлээ.

Tech Crunch-ийн тогтоосноор хамгийн өндөр хамгаалалттай гэгддэг iOS-ийн хэрэглэгчид ч хүртэл мэдээллээ ашиглуулж байгаа. Медиад тань нэвтрэх зөвшөөрөл хүсэхэд нь зөвшөөрөөгүй байсан ч ямар нэг өөрчлөлтгүй. Энэ апп бол хүмүүс үнэгүй аппликейшнээр дамжуулж хувийн мэдээллээ алдаж байгаагийн жишээ билээ. Иймд зурагтай холбоотой аппууд татаж хэрэглэхгүй байхыг мэргэжилтнүүд зөвлөж байна.