Шинэ коронавируст халдварын Монгол дахь нөхцөл байдлын талаар ХӨСҮТ-ийн Ерөнхий захирал Д.Нямхүү өнөөдөр мэдээлэл өглөө.

Тэрээр "7 дугаар сарын 17-нд нийт 555 хүний сорьцод шинжилгээ хийсэн. 530 хүнээс коронавирус илрээгүй. Афганистанаас ирсэн 25 энхийг сахиулагчаас коронавирус илэрлээ. Улмаар нийт 113 энхийг сахиулагч эх орондоо ирснээс одоогоор 53-аас нь коронавирус илэрсэн байна. 

Өчигдрийн шинжилгээнд хамрагдсан бусад хүмүүс нь 7 дугаар сарын 15-нд Сөүл-Улаанбаатар чиглэлийн онгоцоор ирсэн 128 хүн, сайн дураараа эх орон руугаа буцаж буй БНХАУ-ын 240 иргэн, Алтанбулаг боомтоор орж ирсэн ачаа тээврийн 23 жолооч, Сэлэнгэ аймагт тусгаарлагдсан 2 хүн, тандалтаар 9 хүнд хийсэн шинжилгээ, ХӨСҮТ-д тусгаарлагдсан 28 хүний давтан шинжилгээ хамрагдсан. Бүгдийнх нь хариу сөрөг гарсан.

Өнөөдрийн байдлаар Монгол Улсад коронавирусийн нийт 287 батлагдсан тохиолдол бүртгэгдлээ. Үүнээс 211 хүн эдгэрсэн. 76 хүн эмчилгээнд буйгаас 69 хүний биеийн байдал хөнгөн, 7 хүн хүндэвтэр байна. Эмчилгээнд нэг жирэмсэн эмэгтэй байгаа. 

ХӨСҮТ-д нийт 140 хүн эмчилгээ, тандалт, хяналтад байна" хэмээн мэдээллээ.


Share