МАН-ын намын даргыг сонгох санал хураалт хаалттай үргэлжилж байна. МАН-ын даргад У.Хүрэлсүх, Д.Хаянхярваа нар өрсөлдөж буй юм.
Намын даргад өрсөлдөж буй Д.Хаянхярваагийн цаашид хийж хэрэгжүүлэх ажлын талаар Их хуралд тавьсан илтгэлээс онцлох 9 ишлэлийг хүргэе.
- "МАН бол бүдрэхэд "малгай" нь хазайна уу гэхээс "толгой" нь унадаг нам биш. Хагарсан эв бүтэн болж, хугарсан илтгэл бүрэн сэргэж, МАН, Монгол Улс мандан бадрах болтугай"
- "Дээгүүрээ эхэлсэн талцал хуваагдал "Тусгаар тогтнолын ордон"-оос хальж, нийслэл, аймгийн намын хороод руу халдварлаж эхэлснийг таслан зогсоох ёстой"
- "МАН бол Монгол Улсын тусгаар тогтнолыг бүтээгч, бас хамгаалагч нам. МАН хүчтэй байгаа цагт Монгол Улс унахгүй гэдэгт би бат итгэдэг"
- "Одоогийн Засгийн газраа 2020 оны сонгууль хүртэл шүүсийг нь гартал шахаж ажиллуулъя. Монгол Улс, МАН-ын эрх ашгийн төлөө анжисанд хөллөсөн үхэр шиг зүтгүүлье"
- "Хэрвээ би намын дарга болвол манай намын нэр хүндийг маш муухайгаар сэвтээсэн 60 тэрбумын толбыг би бүрэн арилгаж, цэг тавина"
- "Лифтэнд сууж, кранаар өргүүлдэг олон дүүтэй том ах нар л албан тушаалын өндөр карьер ахидаг хүний нөөцийн буруу бодлогыг би хална"
- "Хариуцлага үүрэхээс зугтдаг хүн хэзээ ч сайн удирдагч байж чаддаггүй. Арагш сууж хоцорсон, алдаа хариуцлагаас зугтсан, ар шилэн хүзүүнээс нь харж журмын нөхдөө хагалж шургаж явдаг зан надад байхгүй"
- "Намын дарга хийхэд надад чадахгүй гурван юм бий. Би үнэнээс урваж чадахгүй, шударга бустай эвлэрч чадахгүй, ижил нөхдөө талцуулж явж чадахгүй"
- "МАН бол Монголын Ардчиллын ноён нуруу. Хэрвээ энэ ноён нуруу хугарвал Монголын ардчилал мохно гэж би болгоомжилж явдаг"