Энхээ хэмээх өвөрмонгол залуу ойрын өдрүүдэд Хятадын нийгмийн сүлжээнд од ид яригдаж байна.

Бүх Хятадын хэмжээнд "Сүлжээний од Энхээ" хэмээн танигдсан тэрбээр тик тик-оор дамжуулан Хятадын хэрэглэгчдийг зөв зүйлд байнга уриалан дууддаг гэдгээрээ танигдсан нэгэн аж. Тиймээс түүнийг тик ток апп-ын зүгээс 10 сая юанаар шагнаж урамшуулсан гэнэ. 

Энэ нь монгол төгрөгт шилжүүлбэл 4 тэрбум 440 сая гаруй төгрөгтэй тэнцэх юм. Ажилч хичээнгүй, овсгоо сүйхээтэй Өвөрмонгол малчин залуу Энхээ сар бүрийнхээ орлогын цэвэр ашигаас тодорхой хувийг нь буяны, хүмүүнлэгийн үйлсэд зориулдаг гэдгээрээ алдартай.

Энхээ нь ӨМӨЗО-ны Шилийн гол аймгийн Шулуун хөх хошууны Сангийн далай сумын Эрдэнэдалай гацаанд мал маллан аж төрдөг. Мал маллахынхаа хажуугаар сархинаг, гүзээгээр бууз хийн худалдахаас гадна, 2016 оноос нутгийнхаа "Хунт нуур" гэдэг газар "Их Цахар" нэртэй жуулчны бааз байгуулан ажиллаж байгаа юм. Жуулчны баазынх нь 2020 оны цэвэр ашиг нь 1 сая юан болсон аж.

Мөн хонь, ямаа, үхрийн махыг Хятадын өмнөд нутаг руу арилжиж худалдах бизнесийг эрхэлдэг. Энхээ анх анх тик токоор өөрийн эрхлэж буй бизнесээ сурталчилж ашиглаж эхэлсэн түүхтэй.