Завхан аймгийн Дөрвөлжин сумын Хомын талын байгалийн цогцолборт газар ЮНЕСКО-гийн Шим мандлын нөөц газруудын дэлхийн сүлжээнд албан ёсоор бүртгэгдлээ.

2025 оны 9-р сарын 26–28-нд Хятадын Ханжоу хотод болсон ЮНЕСКО-гийн “Хүн ба шим мандал” хөтөлбөрийн 37-р хурлаар батламжийг гардуулсан байна. Ингэснээр Монгол Улсаас ийм ангилалд бүртгэгдсэн газар нутгийн тоо албан эх сурвалжаар 10 (зарим эх сурвалжаар 12) болж нэмэгдэж байна.

Хомын тал нь 2020 онд улсын тусгай хамгаалалтад орсон 411 мянган га орчим талбайтай. Говь-хээрийн өвөрмөц тогтоцтой энэ нутагт сийрэг ургамалжилт бүхий цөлжүү болон хуурай хээр, Хар нуур, Дөргөн нуурын эргийн зэгсэн шугуй, Завхан голын үржил шимт нуга зэрэг олон янзын экосистем хосолсон. Францын Тахь хамгаалах холбоо болон олон улсын байгууллагуудын судалгаагаар тахь сэргээн нутагшуулахад хамгийн тохиромжтой бүсийн нэгээр тодорсон.

Сүлжээнд багтсанаар тухайн газрын хамгаалалт сайжирч, хүрээлэн буй орчны тогтвортой менежмент, нутгийн иргэдийн амьжиргаа болон аялал жуулчлалын боломжийг олон улсын түвшинд дэмжих ач холбогдолтой юм.

Зураг	Тайлбар