Японы Фүжи уулын бэлд орших Фүжиёшида хотод хаврын хамгийн хүсэн хүлээдэг сакура цэцгийн баярыг энэ жил зохион байгуулахгүй байхаар шийдвэрлэжээ. Орон нутгийн захиргаанаас мэдээлснээр жуулчдын хэтийдсэн урсгал хотын дэд бүтэц, оршин суугчдын өдөр тутмын амьдралд хүндрэл учруулж байгаа тул ийнхүү шийдвэр гаргасан байна.

Хаврын улиралд сакура цэцэглэдэг үеэр тус хот жуулчдын хамгийн их очдог бүсэд тооцогддог бөгөөд оргил үедээ өдөрт 10 мянга хүртэл жуулчин ирдэг аж. 

Харин сүүлийн жилүүдэд аялагчдын тоо огцом нэмэгдсэнээр замын хөдөлгөөний түгжрэл үүсэх, хог хаягдал нэмэгдэх зэрэг асуудал даамжирчээ. Түүнчлэн зарим жуулчин хувийн эзэмшлийн талбайд зөвшөөрөлгүй нэвтрэх, бүр бие засах зэрэг ёс зүйгүй үйлдэл гаргасан талаар иргэд гомдол гаргасан байна.

Хотын дарга мэдэгдэлдээ, "Жуулчдын хэт их урсгал нь иргэдийн амар тайван амьдралд нөлөөлж, зохицуулахад хүндрэлтэй болж байна” хэмээгээд, нөхцөл байдлыг хяналтдаа авах хүртэл баярыг түр хугацаанд зогсоохоор болсныг мэдээлжээ.

Япон улс сүүлийн жилүүдэд жуулчдын хөлд дарагдаж зарим хот, аялал жуулчлалын бүсүүд жуулчдын урсгалыг хязгаарлах, зохицуулалт хийх арга хэмжээ хүртэл авч эхэлсэн байна.