Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17)-ыг энэ оны наймдугаар сарын 17-28-ны өдрүүдэд Монгол Улсад зохион байгуулахаар төлөвлөж буй. Тэгвэл олон улсын хэмжээний уг арга хэмжээнд гадаадын зочид төлөөлөгчид олноор ирэхтэй холбоотойгоор нийслэлийн замын хөдөлгөөний ачааллыг зохицуулах шаардлага үүсэж байгаа аж.

Үүнтэй холбогдуулан Байгаль орчин, уур амьсгалын өөрчлөлтийн яамнаас 2026-2027 оны хичээлийн шинэ жилийг хойшлуулж, есдүгээр сарын 15-наас эхлүүлэх саналыг Боловсролын яаманд хүргүүлжээ.

Албаныхны мэдээлснээр, хуралдааны үеэр төрийн болон олон улсын байгууллагын төлөөлөгчид, зочид төлөөлөгчдийн хөдөлгөөн нэмэгдэх тул хотын төвийн замын ачаалал эрс өснө гэж үзэж буй юм. Иймд сургуулийн хичээл эхлэх хугацааг түр хойшлуулснаар түгжрэлийг бууруулах, арга хэмжээг хэвийн явуулах боломж бүрдэнэ хэмээн үзэж буй аж.

COP17 нь дэлхийн улс орнууд цөлжилт, газрын доройтол, уур амьсгалын өөрчлөлтийн эсрэг хамтын ажиллагааг хэлэлцдэг өндөр түвшний чуулга уулзалт бөгөөд Монгол Улсад анх удаа зохион байгуулагдаж буйгаараа онцлог.

Одоогоор Боловсролын яамнаас уг саналыг хэрхэн шийдвэрлэх талаар албан ёсны байр суурь хараахан мэдээлээгүй байгаа ажээ.