Сар шинийн баярын өдрүүдэд уламжлалт зоог болох ууц, бууз, банш, чихэр, архи дарс их хэмжээгээр давтамжтай хэрэглэснээр хоол боловсруулах систем богино хугацаанд өндөр ачаалал авдаг. Үүний дараа гэдэс дүүрэх, хүнд оргих, өтгөн хатах, нойрмоглох зэрэг шинж илрэх нь бий. 

Энэ тохиолдолд эмч болон хоол зүйчид огцом мацаг барих, эсвэл туулгах эм зэргийг шууд уухаас илүүтэй энгийн бөгөөд үр дүнтэй дараах аргуудыг туршиж үзэхийг зөвлөж байна. 

24 цагийн дэглэм

ӨГЛӨӨ (07:00–10:00)-Сэргээх үе 

Сэрээд шууд 1–2 аяга бүлээн ус уух

Хэт их идсэний дараах өглөө сэрээд 1–2 аяга бүлээн ус уух нь гэдэсний гүрвэлзэх хөдөлгөөнийг идэвхжүүлдэг. Халуун биш, бүлээн байх нь чухал. Хүсвэл нимбэгийн зөөлөн шүүс дусааж болно.

Хөнгөн хөдөлгөөн (10–20 мин) 

Үүний дараа 10–20 минут алхах, сунгалт хийх зэргээр гэдэсний дүүрэнгийг багасгаж, бодисын солилцоог сэргээх нь чухал.

Өглөөний цай

Өглөөний цайнд аль болох хөнгөн хоол хүнс хэрэглэх хэрэгтэй. Овьёос, тараг, жимс, ногоотой зутан зэрэг эслэг ихтэй хүнс нь хоол боловсруулалтыг дэмжинэ. Харин шарсан хоол, бууз, кофеийг өлөн дээрээ хэрэглэхээс зайлсхийхийг зөвлөж байна.

• Овьёос, тараг, жимс

• Эсвэл ногоотой зутан

• Чихэргүй, тос багатай байх

Зайлсхийх: кофе хоосон ходоод дээр, шарсан мах, бууз

ӨДӨР (12:00–15:00)-Тэнцвэржүүлэх үе

Өдрийн хоол - тэнцвэртэй, шингэц сайтай байх ёстой. Өдрийн хоолонд ногоо ихтэй шөл, жигнэсэн эсвэл чанасан мах бага хэмжээгээр, бүхэл үрийн бүтээгдэхүүн тохиромжтой. Эслэг болон уураг нь удаан хугацаанд цатгалан мэдрэмж төрүүлдэг.

Мөн өдрийн турш бага багаар ус уух нь чухал. Ногоон цай, чацарганы шүүс зэрэг. Харин хийжүүлсэн ундаа, чихэрлэг жүүс нь гэдэс дүүрэхийг нэмэгдүүлдэг. Түүнчлэн хоолны дараа шууд хэвтэхийн оронд 10–15 минут алхах нь хоол шингээлтийг сайжруулна.

Хоол: 

• Ногоо ихтэй шөл

• Жигнэсэн эсвэл чанасан мах (бага хэмжээгээр)

• Бор будаа, бүхэл үр 

Шингэн:

• Өдрийн турш бага багаар ус уух (1–1.5 л)

• Ногоон цай, чацарганы шүүс тохиромжтой

Хөдөлгөөн: 

Богино алхалт (10–15 мин)

ОРОЙ (18:00–20:00) - Амраах үе

Орой хоолыг аль болох хөнгөн байлгана. Тараг, ногооны салат, шөл, жимс зэрэг нь гэдэс амраахад тустай. Харин мах, өөх тос ихтэй хоол, бууз банш, архи дарс хэрэглэх нь шөнийн турш хоол боловсруулах системийг ачааллуулдаг.

• Тараг, салат, ногооны шөл

• Жимс (их биш)
  

• Гаа, гоньд, ромашка зэрэг бүлээн цай (хий дүүрэлтийг багасгаж, тайвшруулах үйлчилгээтэй)

УНТАХЫН ӨМНӨ (21:00–23:00) - Сэргээн засах үе

• Бүлээн шүршүүрт орох

• Хөнгөн сунгалт хийх

• Дэлгэцийн хэрэглээг багасгах

Энэ бүхний дараа 7–8 цагийн нойр авах нь маш чухал. Чанартай нойр таны бодисын солилцоог хэвийн болгож, биеийг хурдан сэргээдэг.