Цэргийн бүртгэлийн хугацаа дууссан ч, бүртгүүлж амжаагүй иргэдийг тодорхой хугацаанд торгуульгүй бүртгэх болсон талаар нийслэлийн ЗДТГ-ын Цэргийн штабаас өнөөдөр мэдээллээ.

Нийслэлийн ЗДТГ-ын Цэргийн штабын дарга, хурандаа Ж.Болдбаатар "Нийслэлийн хэмжээнд цэргийн бүртгэлийг 2020 оны нэгдүгээр сарын 20-ноос хоёрдугаар сарын 07-ны өдрүүдэд явуулж дууслаа. Цэргийн бүртгэлийг засаг захиргааны анхан шатны нэгж болох 173 хороонд явуулсан. 

Энэ жил цэргийн бүртгэлд хамрагдах ёстой хүмүүсийн 95.3 хувь нь бүртгүүллээ. Өнгөрсөн онд 96.5 хувь байсан. 

Бүртгэл явуулах хугацаанд хорио цээрийн дэглэм гарч, тодорхой хязгаарлалт явагдсан. Хорио цээрийн дэглэм тогтоосонтой холбоотой зэрэг шалтгаанаар цэргийн бүртгэлд хамрагдаагүй олон хүн байна. 

Эдгээр хүмүүсийг гуравдугаар сарын 05-15-ны хооронд харъяа дүүргийн Цэргийн штабууд дээр бүртгэнэ. Гуравдугаар сарын 05-ныг хүртэлх өдрүүдэд бүртгэхгүй. Дээрх хугацаанд бүртгүүлэхэд Зөрчлийн тухай хуулийн дагуу ч юм уу ямар нэгэн арга хэмжээ, торгууль авахгүй, шууд бүртгэнэ" хэмээн мэдээллээ.