Улсын онцгой комисс өнөөдөр шинэ коронавирустэй холбоотой асуудлаар хуралдаж, Цагаан сарыг хэрхэн тэмдэглэх талаар шийдвэр гаргажээ.

Шийдвэрийн талаар Улсын онцгой комиссын гишүүн, Батлан хамгаалахын сайд Н.Энхболд "Удахгүй уламжлалт Цагаан сар болно. Энэ баяраар хөл хөдөлгөөн ихтэй, олон хүн бие биенийдээ айлчилдаг учраас өвчний цар хүрээг тэлэх, халдвар дамжуулах нөхцөл үүсгэж магадгүй. Тиймээс Цагаан сарыг хэрхэн тэмдэглэх талаар ярьж байна. Шууд хориглох бол хэцүү. Монгол Улс өнөөдрийн байдлаар тийм нөхцөлд хүрээгүй. Гэхдээ бид бүх л нөхцөл байдалд бэлтгэлтэй байх үүднээс боломжит арга хэмжээнүүдийг авч байна. 

Цагаан сарыг хэт өргөн биш гэр бүлийн хүрээнд тэмдэглэнэ. төр, хувийн хэвшлийн бүх шатны байгууллага, хамт олны зохион байгуулалттай золголтыг хийхгүй байх нь зөв гэж шийдвэрлэлээ. Гуравдугаар сарын 02-ныг хүртэл ийм төрлийн олон нийтийг хамарсан арга хэмжээг бүгдийг нь хориглосон. Тиймээс Цагаан сарын бөхийн барилдаан, төрийн золголт, байгууллага, нутгийн зөвлөлийн золголтыг зохион байгуулахгүй" хэмээн мэдээллээ.

Share