Говийн их дархан цаазат газар байгуулагдсаны 50 жилийн түүхт ойг тохиолдуулж Ерөнхийлөгч У.Хүрэлсүхийн зарлигаар тус хамгаалалтын захиргааг  "Алтан гадас" одонгоор шагналаа.  

1975 онд Говийн их дархан цаазат газар болон түүний хамгаалалтын захиргаа байгуулагдсан нь Монгол Улсад төдийгүй олон улсад онцгой ач холбогдолтой үйл явдал болсон хэмээн үздэг. 

Энэхүү шийдвэрээр дэлхийд эхний аравт багтах томоохон экосистемийг бүхэлд нь хамгаалалтад авч, хүний үйл ажиллагааны нөлөөнд өртөөгүй, унаган төрхөө хадгалсан говь цөлийн ховор, өвөрмөц экосистемийг хамгаалж үлдэх үндэс тавигдсан. Үр дүнд нь уг нутаг дахь амьтан, ургамлын зүйлийн бүрдэл, экологийн үнэ цэнэ, дархан цаазын ач холбогдлоороо олон улсын түвшинд хүлээн зөвшөөрөгдөх хэмжээнд хүрсэн юм.

Говийн их дархан цаазат газар байгуулагдсанаас хойш “Говийн их дархан газрыг хөгжүүлэх”, “Тахь нутагшуулах”, “Их говийн экосистем болон түүний шүхэр зүйлийг хамгаалах”, “Говийн баавгай”, “Хавтгай тэмээ үржүүлэх”, “Монголын унаган байгалийн хүлцэл, тогтворжилтыг хангах” зэрэг олон улсын болон үндэсний хэмжээний томоохон төслүүдийг амжилттай хэрэгжүүлээд байна.

Зураг	Тайлбар