Шинэ коронавирусийн дэгдэлттэй холбоотойгоор зам, тээврийн салбарт зарим зохицуулалт хийсэн талаар Зам, тээврийн хөгжлийн сайд Б.Энх-Амгалан өнөөдөр мэдээлэл өглөө.

Тэрээр "Төмрийн хүдэр, нүүрс, жонш, зэсийн баяжмалыг экспортлохоор боллоо. Оюу толгойн зэсийн баяжмал гарч байгаа. Замын-Үүдээр контейнер тээвэр болон нүүрс тээвэр явж байна. Гашуун сухайтын тээвэр ирэх даваа гарагт эхэлнэ. Гэхдээ олон мянган тээврийн хэрэгсэл явахгүй. Зөвхөн контейнер тээврийг 70-100 орчим машинаар хийхээр төлөвлөж байна. Мэргэжлийн хүмүүс газар дээр нь ажиллаж байна.

Жолооч хилээр гарахдаа каск, нүдний шилтэй хамгаалалтын хувцастай гарна. Хилээр гарангуут нь БНХАУ-ын тал ачаатай контейнер буулган авч, шууд хоосон контейнер ачиж өгнө. Жолооч тэндээ хол идэхгүй, машинаасаа буухгүй, хүнтэй уулзаж харилцахгүй шууд хилээр буцаж орж ирэх зохицуулалтыг БНХАУ-ын талтай хийсэн.

Бүтээн байгуулалтын улирал эхэлж буйтай холбоотойгоор ажиллах хүчний асуудлыг Засгийн газар хэлэлцсэн. Хувийн аж ахуйн нэгж болон онцгой шаардлагагүй төслүүд дээр гаднаас ажиллах хүч оруулж ирэх бололцоо одоогоор байхгүй. Нийт 6000 гаруй ажиллах хүч Монголд орж ирэх шаардлага байгаа. Онцгой шаардлагатай гэрээтэй, тодорхой хугацаатай ажлууд даар гадаадаас ажиллах хүч авъя гэж ярилцаж байна. 

Дархан замыг барихад оролцох ажиллах хүч болох 105 хятад иргэнийг энэ ням гарагт БНХАУ-аас тусгай нислэгээр авчирна. Тэд улсдаа шинэ коронавирусийн шинжилгээ өгөөд, визээ авна. Хөдөлмөр эрхлэлтийн зөвшөөрлөө эндээс авна. 

Тэднийг тусгай үүргийн онгоцноос буунгуут нь бид тусгай машинаар хамгаалалтад аваад Төв аймгийн нутагт 14 хоног тусгаарлана. Энэ хугацаанд бичиг баримт болон бусад ажлуудаа хийнэ. Тусгаарлалтын хугацаа дуусахад шинжилгээний хариунуудыг нь харж байгаад ажилд нь оруулна. Туслан гүйцэтгэх компаниуд ажилдаа гарч эхэлсэн" хэмээлээ.

Share