Засгийн газар өнгөрсөн сард коронавирусийн дэгдэлтийн үеийн онцгой нөхцөл байдалд эдийн засгийг дэмжих хүрээнд онцлох 7 шийдвэр гаргасан. Тэдгээрийн нэг нь сар бүх хүүхдэд олгодог 20.000 төгрөгийн тэтгэмжийг гурван сарын хугацаанд 30.000 төгрөг болгон нэмэгдүүлж олгоно гэсэн юм. Тэгвэл өнөөдрөөс уг шийдвэр хэрэгжиж эхэлжээ.

Энэ талаар Сангийн сайд Ч.Хүрэлбаатар "Хүүхдийн мөнгийг 30.000 төгрөг болгон нэмэгдүүлж, өнөөдөр буюу олгож эхэллээ. Ерөнхий сайд У.Хүрэлсүхийн ард иргэддээ мэдэгдсэн коронавирусийн эсрэг авах багц арга хэмжээний хүрээнд дараагийн арга хэмжээ болох Хүүхдийн мөнгийг нэмэгдүүлж, 4 дүгээр сарын 16-ны өдрөөс олгож эхэллээ. Эхний арга хэмжээ нь бензиний үнийн бууралт байсан. Амлалт ажил хэрэг болж байна" хэмээн цахим хуудсаараа мэдээллээ.