Нийслэлийн Зам, тээврийн асуудал хариуцсан төслүүдийн удирдагч Б.Отгонсүхээр ахлуулсан ажлын хэсэг өнөөдөр Сонгинохайрхан дүүргийн 22 дугаар хороо Тахилтын авто замаас авто цогцолбор хүртэлх 1,5 км авто зам болон нүхэн гарцын ажлын явцыг шалгалаа.

Уулзалтын үеэр нийслэлийн Засаг даргын орлогч Б.Отгонсүх “Тахилтын авто замаас Авто цогцолбор хүртэлх замын ажлын явцыг өнөөдөр шалгаад, шуурхай шийдвэрлэх асуудлууд дээр нь нийслэлээс дэмжлэг үзүүлэхээр ярилцлаа. 

Уг зам нь 1.5 км урттай, 14 м өргөнтэй дөрвөн эгнээ зорчих хэсэгтэй, хоёр цэгт ус зайлуулах Ф1000 хоолойтой, иж бүрэн гэрэлтүүлэгтэй байхаар төлөвлөгдсөн. 

Өнөөдрийн байдлаар Тахилтын авто замаас урагш төмөр зам хүртэлх 700 м газрын хөрс хуулалт, ухмал, далангийн дүүргэлтийн ажлууд хийгдээд хуваарийн дагуу явж байна.

Замын ажил хийгдэж буйтай холбоотой газар чөлөөлөх шаардлагатай гурван байршлыг нийслэлээс шийдэж өгөхөөр болсон. Энэ жил бороо хур ихтэй байгаа учраас ажлаа зөв төлөвлөн зохион байгуулах шаардлагатай байна. Шинээр тавигдаж буй бүх зам дээр ус зайлуулах хоолойг стандартын дагуу хийлгэж байна. Хот замуудаа хүлээж авахдаа зургийн дагуу иж бүрэн гүйцэтгэлтэй хүлээж авах болно. 

Энэхүү зам нь гадна тойруугийн зам болж байгаа бөгөөд ашиглалтад орсноор хөдөлгөөний ачааллыг хуваалцах чухал ач холбогдолтой. Нүхэн гарцын ажлын явцын талаар холбогдох инженер, мэргэжилтнүүдтэй хуралдаж, явцыг хэлэлцэнэ. Чанартай, гүйцэтгэл сайтай хийж байгаа аж ахуйн нэгжүүдээ хот дэмжээд явна.

Харин хариуцлагагүй, гүйцэтгэл муутай аж ахуйн нэгжүүдийг бид хар жагсаалтад оруулаад явна. Нэгэнт ажил хийж чадна гээд авсан бол сэтгэл гаргаж, мэргэжлийн түвшинд гүйцэтгэхийг шаардах болно” гэлээ.

Уг замыг зам доогуурх нүхэн гарцын хамт ирэх 10 дугаар сард ашиглалтад оруулах аж.

Share