Аймаг, нийслэлийн хөдөлмөр эрхлэлтийн байгууллагад ажил хайж бүртгүүлсэн иргэдийн тоо 2021 оны 2 дугаар сарын эцсийн байдлаар 23.3 мянга болжээ. Үүнээс 15.5 мянга буюу 66.3 хувь нь бүртгэлтэй ажилгүй иргэд, 7.8 мянга буюу 33.7 хувь нь ажилтай боловч өөр ажил хайж байгаа иргэд байна. 

Бүртгэлтэй ажилгүй иргэдийн 8 мянга буюу 51.6 хувь нь эмэгтэйчүүд байна.

Нийт бүртгэлтэй ажилгүй иргэд өмнөх оны мөн үеэс 5.2 мянган хүнээр буюу 25.1 хувиар, өмнөх сараас 1 мянган хүнээр буюу 6.1 хувиар буурчээ. 

Аймаг, нийслэлийн хөдөлмөр эрхлэлтийн байгууллагад 2021 оны 2 дугаар сард ажилгүй 3.6 мянган иргэн шинээр бүртгүүлж, бүртгэлтэй байсан 0.3 мянган иргэн ажилд зуучлагдан орж, 4.3 мянган иргэн ажил идэвхтэй хайхгүй байгаа шалтгаанаар бүртгэлээс хасагдсан байна. 

Үүнээс Улаанбаатар хотод 2021 оны 2 дугаар сард нийт 1.2 мянган иргэн нийслэл, дүүргийн хөдөлмөр эрхлэлтийн байгууллагад шинээр бүртгүүлж, бүртгэлтэй байсан 56 иргэн ажилд зуучлагдан орсон байна.

Улсын хэмжээнд өмнөх оны мөн үеэс шинээр бүртгүүлсэн ажилгүй иргэд 881 хүнээр, ажилд зуучлагдан орсон иргэд 402 хүнээр буурч, ажил идэвхтэй хайхгүй байгаа шалтгаанаар бүртгэлээс хасагдсан иргэд 562 хүнээр нэмэгджээ. Харин өмнөх сараас шинээр бүртгүүлсэн ажилгүй иргэд 932 хүн, ажилд зуучлагдан орсон иргэд 404 хүн, ажил идэвхтэй хайхгүй байгаа шалтгаанаар бүртгэлээс хасагдсан иргэд 1.1 мянган хүнээр тус тус буурчээ.

Хөдөлмөр эрхлэлтийн байгууллагад 2021 оны 2 дугаар сард 3.6 мянган хүн шинээр бүртгүүлсний 877 буюу 24.5 хувь нь ажлаас чөлөөлөгдсөн болон халагдсан иргэд байгаа нь өмнөх сараас 186 хүнээр буюу 26.9 хувиар өсжээ.

Сүүлийн 4 жилийн энэ үед бүртгэлтэй ажилгүй иргэд, нийслэл орон болон аймаг тус бүрт хэд байсныг хүснэгтээр хүргэж байна.


Хөдөлмөр эрхлэлтийн байгууллагад шинээр бүртгүүлсэн 3.6 мянган ажилгүй иргэний ажилгүй байгаа шалтгааныг эзлэх хувиар нь үзвэл:

- 24.5 хувь нь ажлаас халагдсан, чөлөөлөгдсөн иргэд байна. Тэдний 75 орчим хувь нь орон тооны цомхтголд оржээ.

- 23.6 хувь нь сургууль төгсөөд ажилгүй байгаа иргэд

- 11.3 хувь нь Шилжин суурьшсан иргэд

- 40.6 хувь нь бусад шалтгаанаар ажилгүй байгаа иргэд байна.


Дэлгэрэнгүйг дараах инфографикаас харна уу.



Эх сурвалж: Үндэсний статистикийн хороо

Share