Өчигдөр УИХ-ын дарга Баянхонгор аймгийн нутгийн зөвлөлтэй хамтран Г.Занданшатар МУ-ын Гавьяат тамирчин М.Уранцэцэгт гурван өрөө байрны түлхүүр гардуулсан.

Харин Ц.Цогтбаатарт  УИХ-ын гишүүд, Гадаад хэргийн сайд, Эрчим хүчний дэд сайд , нийслэлийн Засаг даргын орлогчид Баянхонгор аймгийн удирдлагууд хамтран гурван өрөө орон сууц бэлэглэсэн билээ. 

Мөн Ц.Цогтбаатарын багш Ц.Шийрэвийг 10 сая төгрөгөөр урамшуулж, Баянхонгор нутгаас төрсөн М.Цэрэнлхам, Б.Хонгорзул, Л.Сосорбарам нарын тамирчдадаа тус бүр 5 сая төгрөгөөр урамшуулж,  үндэсний үйлдвэрлэгч “НЭГҮН кашмер” компанийн бүтээгдэхүүнээс бэлэг болгон өгсөн юм.

Харин мөнгөн медаль хүртсэн  Саид Моллаейд  ямар нэг шагнал урамшуулал өгөөгүй байна. Энэ нь түүнд ихэд гомдолтой санагдсан талаар хэвлэлд ярилцлага өгчээ.

Тэрбээр “Бусад тамирчдад олон төрлийн бэлэг бэлэглэсэн мөртлөө надад юу ч өгөөгүйд харамсч байна. Би одоо ч зочид буудалд амьдарч байна. Надад өгсөн машин 2010 оных байсан. Би Монгол Улсын Засгийн газар , Монголын үндэсний олимпийн хороонд гомдож байна” гэж ярьжээ.

Ярилцлагын үеэр тэрбээр "Аса аварга" Д.Дагвадорж өөрт нь  гурван өрөө байр бэлэглэнэ гэсэн ч өгөөгүй талаар дурдсан юм . 

Анх 2019 онд Саид Моллаейг  Монголын иргэншил авах үед л Асашорюү Д.Дагвадорж өөрийн цахим хуудсаараа дамжуулан түүнд гурван өрөө байр өгнө гэж амласан. Харамсалтай нь, өдийг хүртэл амлалтдаа хүрээгүй яваа ажээ.

Түүнчлэн Засгийн газраас 60 сая төгрөг олгох, сар бүрийн 3 сая төгрөгийн урамшуулал нь бодитоор олгогдоогүй байгаа гэнэ. 

Харин Монгол Улсын Засгийн газраас олимпын медальт тамирчнуудтай албан ёсоор хүлээн авч уулзаагүй байгаа гэж мэдээлсэн бөгөөд дээрх мөнгөн шагналуудыг Ерөнхийлөгч хүлээн авсны дараа олгож эхлэх юм.