Шинэ коронавирустэй холбоотой асуудлаар Улсын онцгой комисс өнөөдөр хуралдаж, зарим аймгаас цэрэг татахгүй байх шийдвэр гаргалаа.

Энэ талаар Улсын онцгой комиссын орлогч дарга, Батлан хамгаалах яамны сайд Н.Энхболд "Цэргийн ээлжит татлагыг энэ оны 5 дугаар сард багтаан явуулах ёстой. Үүсээд буй нөхцөл байдалтай холбоотойгоор цэрэг татлагыг дараах байдлаар зохион байгуулахаар шийдвэрлэлээ.

Хилийн аймгууд болох Сэлэнгэ, Дорноговь, Баян-Өлгий болон Улаанбаатар хотоос энэ жил цэрэг татахгүй. Зайлшгүй шаардлагаар буюу ялангуяа хилийн цэргүүд халагдангуут хил дээр алба хаах цэргүүдийн тоо буурсан байж болохгүй учир хилийн цэрэг, Зэвсэгт хүчний нэг тусгай ангид цэрэг татна. Бусад цэргийн ангид хугацаат цэргийн алба хаагч татахгүй байхаар шийдвэрлэлээ.

Өөрөөр хэлбэл, гол төлөв хилийн цэргийн ангиудад тухайлан анги, нэгтгэлүүд дээр нь зайлшгүй шаардлагатай байгаа цэргийг нөхөн татах ажлыг өндөржүүлэн бэлэн байдал зарласан нөхцөлийн дагуу зохион байгуулна. Энэ хүрээнд нэг дор 5-аас олон хүн цуглуулахгүйгээр цэргийг бүртгэх, шалгах, эрүүл мэндийн үзлэгт оруулах, тээвэрлэх ажлыг нарийн төлөвлөж хийнэ" хэмээлээ.

Share