Дэлхийд зөвхөн Монголын Алтайн өвөр говьд амьдардаг мазаалай нь устах аюулд орсон хөхтөн амьтдын хамгийн эмзэг ангилалд багтдаг. 

Гэвч сүүлийн жилүүдэд мазаалайн үндсэн байршил нутаг Нарансэвстэйн нуруунд хилийн боомт нээх асуудал Засгийн газрын мөрийн хөтөлбөрт тусгагдсан нь анхаарал татах болсон. Салбарын мэргэжилтнүүд мазаалайн үндсэн тархац, амьдрах орчны цөм хэсэгт хамаардаг тус нутагт боомтыг нээхийг эрс эсэргүүцдэг. Өнгөрсөн онд УИХ-д гаргасан "Нарансэвстэйн хилийн боомтыг нээх" заалтыг хүчингүй болгох өргөдөлд 33 мянган иргэн гарын үсэг зурсан байдаг. 

Өнөөдөр "Үндэсний бахархалт амьтан мазаалай"-г хамгаалах өдөр тохиож байна. Дэлхийн нэн ховор мазаалайн талаар мэдэх ёстой цөөн боловч чухал баримтуудыг Танд хүргэе.