Увс аймгийн Тариалан сумын Орлогын голд тусгай зөвшөөрөл, бичиг баримтгүй хэсэг иргэд техник тоног төхөөрөмжөө байршуулан алт олборлох ажлыг эхлүүлэхээр зэхэж байсныг зогсоосон байна. Тодруулбал, аймгийн ЗДТГ-ын болон МХГ-ын байцаагч нарын хамтарсан ажлын хэсэг энэ сарын 16-нд Тариалан сумын нутаг болох Бор хавцал, Орлогын гол зэрэг газарт хяналт шалгалт хийж тухайн хэсэг иргэдийн үйл ажиллагааг хууль бус гэж үзэн зогсоожээ.

Эдгээр иргэд нь Орлогын гол орчимд нөхөн сэргээлт хийхээр ирсэн гэж байгаа ч холбогдох бичиг баримтгүй байжээ. Тэгээд ч энэ жил Орлогын голд нөхөн сэргээлт хийх ажлын төлөвлөлт байхгүй байна. Иймээс ажлын хэсгийн гишүүд тэднийг хууль бусаар алт олборлохоор зэхэж байсан гэж үзээд ажлыг нь ийнхүү зогсоожээ. Хууль бусаар алт олборлох гэж байсан иргэдийн хувьд хоёр ч эксковатор, хүнд даацын 3-4 автомашин гэх мэт маш их тоног төхөөрөмжтэй, техник сайтай байсан аж.

“Энэ жил Тариалан сумын нутаг Бургастайд бичил уурхайн хэлбэрээр олборлолт хийх 4.5 га газрын дүгнэлт нь гарсан ч хууль журмын дагуу албан ёсоор бүртгэгдэж хүсэлтээ гаргаж ажлаа эхүүлсэн нөхөрлөлүүд байхгүй, зарим нэр бүхий нөхөрлөлүүдийн хувьд Ашигт малтмал, газрын тосны газраас дүгнэлт нь гарч дэмжигдэхгүй байгаа. Ер нь бол сүүлийн жилүүдэд хууль бусаар алт олборлох явдал Увс аймагт цөөнгүй гарч байна. Өнгөрсөн жилийн тухайд энэ байдал хэрээс хэтэрч нөхөн сэргээлт хийх нэрийн дор хууль бусаар алт олборлосон зөрчил цөөнгүй гарсан. Тиймээс энэ байдлыг таслан зогсоохын тулд аймаг орон нутгаас анхаарч ажиллаж байна” хэмээн аймгийн МХГ-ын геологи, уул уурхайн хяналтын улсын байцаагч Ц.Баттулга мэдээллээ.



Эх сурвалж: МОНЦАМЭ агентлаг