“Улаанбаатар марафон-2023” олон улсын гүйлт амжилттай болж өндөрлөлөө. Энэ хүрээнд нийслэлийн төв хэсгийг автомашины хөдөлгөөнөөс чөлөөлж, марафонд оролцогчид гүйж, иргэд чөлөөтэй зорчих, явган алхаж, дугуй, ролик, скүүтер унаж, биеэ чийрэгжүүлэх боломж олгосон билээ. Энэ удаагийн “Улаанбаатар марафон-2023” олон улсын гүйлт өдөрлөг болон өргөжиж, хувийн хэвшлийн оролцоог нэмэгдүүлж, мөн хагас, бүтэн марафонд хөгжлийн бэрхшээлтэй иргэдийн гүйлтийн төрлийг нэмснээрээ онцлогтой байв. 

Тус өдөрлөгт 100 гаруй аж ахуй нэгж, 500 гаруй сайн дурын ажилтан оролцож, 30 орны 20 мянга гаруй хүн хурд хүчээ сорилоо. Тодруулбал, өдөрлөгт спортын чиглэлээр үйл ажиллагаа явуулдаг байгууллагуудаас гадна олон улсын байгууллагууд, Элчин сайдын яамд, уул уурхай, банк санхүү, худалдаа үйлчилгээний байгууллагууд оролцов. Мөн гүйлтийн зам дагуу дөрвөн усны цэг ажиллаж, цэг тус бүрд эрүүл мэндийн үзлэг, үйлчилгээ үзүүлж байлаа.

Марафонд оролцогчид 1.5 км, 5 км, 10 км, 21 км, 42 км-т гүйв. “Улаанбаатар марафон” олон улсын  гүйлтэд хамгийн анх 2014 онд 16.839 иргэн оролцож байсан бол 2015 онд 18.085, 2016 онд 25.000, 2017, 2018 онд 30.000-д хүрчээ. Мөн 2019 оноос нийслэлийн иргэдээс гадна хөдөө, орон нутаг, Монгол Улсад ажиллаж, амьдарч байгаа гадаадын иргэд, хөрш зэргэлдээ орны гүйлт сонирхогчид болон олон улс, тив, дэлхийд танигдсан нэртэй тамирчид зэрэг 32.000 гаруй хүнийг хамруулан амжилттай зохион байгуулсан. Харин 2020, 2021 онд дэлхий нийтийг хамарсан цар тахлын улмаас марафон завсарлаж, өнгөрсөн 2022 онд 2022 онд 29 орны 23,690 хүн оролцсон билээ.

Марафонд оролцсон дэлхийн шилдэг тамирчид

Үндэсний шигшээ багийн тамирчин, ОУХМ Цэвээнравдангийн Бямбажав

Тэрбээр “Рио-2016”, “Токио-2020” олимпын наадам, “Лондон-2017”, “Доха-2019” Дэлхийн аварга шалгаруулах тэмцээнд амжилттай оролцсон, “Ороген-2022” Хөнгөн атлетикийн дэлхийн аварга шалгаруулах тэмцээнд оролцох эрх авсан тамирчин. Түүний марафон гүйлтийн дээд амжилт 2:16:18 секунд юм.  

Үндэсний шигшээ багийн тамирчин, ОУХМ Дамбадаржаагийн Гантулга

Д.Гантулга “Рио-2016” олимпын наадам, 2014, 2018 оны Азийн аварга шалгаруулах тэмцээнд оролцож байсан. “Ороген-2022” Хөнгөн атлетикийн дэлхийн аварга шалгаруулах тэмцээнд оролцох эрх авсан.

Үндэсний шигшээ багийн тамирчин, ОУХМ Баярцогтын Мөнхзаяа

“Рио-2016”, “Токио-2020” олимпын наадам, “Лондон-2017”, “Доха-2019” Дэлхийн аварга шалгаруулах тэмцээнд оролцогч, 3000м, 5000м, 10000м, хагас марафон, марафон гүйлтийн Монгол Улсын рекордын эзэн, “Улаанбаатар марафон” олон улсын гүйлтийн таван удаагийн аварга, Монгол Улсын 20 удаагийн аварга, “Ороген-2022” Хөнгөн атлетикийн дэлхийн аварга шалгаруулах тэмцээнд оролцох эрх авсан тамирчин. Түүний марафон гүйлтийн дээд амжилт 21095 м зайд 1:13:31 секунд юм.

Кени Улсын бүтэн марафоны тамирчин Серой Андерсон Сайтоти

Итали Улсын “Венис-2021” марафонд 2:12:21 секундийн амжилтаар алтан медаль хүртэж байсан.  2020 онд Тайландад болсон “Amazing Thailand Marathon”-д 2:23:52 секундийн амжилтаар 7-р байрт, “Шиамэн–2020” марафонд 2:13:47 секундийн амжилтаар  8-р байранд тус тус шалгарсан, Кени Улсын шилдэг тамирчдын нэг.

Кени Улсын бүтэн марафоны тамирчин Киура Денис Мугенди

Тэрбээр “Chi Zhou-2019” тэмцээний алтан медальт, Итали Улсын “Палермо-2021” марафонд 2:23:54 секундийн амжилт, 2016 онд болсон “Чунгчин” олон улсын тэмцээнд 2:21:05 секундийн амжилт үзүүлж, шилдэг 20-д шалгарсан тамирчин юм.

Япон Улсын хагас марафоны эмэгтэй тамирчин Акемото Ай

2022 онд Япон Улсад болсон “Hofu Yomiuri“ бүтэн марафонд оролцож, 2:34:17 секундийн амжилт үзүүлж хүрэл медаль медаль хүртсэн. 2019 онд Япон улсад болсон Үндэсний корпорацийн нэрэмжит хагас марафонд 1:12:49 секундийн амжилт үзүүлсэн.

Франц Улсын хагас марафоны тамирчин Боукебал Азиз

Испани Улсад болсон “Барселон-2022” хагас марафонд оролцож, 1:03:54 секундын амжилтаар 13-р байрт шалгарсан тамирчин юм.