Африк тивийн Өмнөд Судан улс дахь энхийг дэмжих ажиллагаанд Монгол Улсын цагдаагийн байгууллагын долоон алба хаагч үүрэг гүйцэтгэхээр болжээ.

Монгол Улс цагдаагийн байгууллагаас сүүлийн таван жилийн хугацаанд НҮБ-ын Энхийг дэмжих ажиллагаанд цагдаагийн зөвлөхөөр нийт 19 алба хаагч үүрэг гүйцэтгэсэн. Одоогийн байдлаар Бүгд Найрамдах Өмнөд Судан болон Бүгд найрамдах Судан улсын дундын бүсэд нэг алба хаагч үүрэг гүйцэтгэж байгаа бөгөөд бусад нь эх орондоо ирсэн байна.

Энхийг дэмжих ажиллагаа /UNMISS/-нд 2016 оноос хойш манай байгууллагын нийт 20 алба хаагч томилогдож, хүлээсэн үүргээ нэр төртэйгөөр, амжилттай гүйцэтгэсэн. НҮБ-аас өндрөөр үнэлж, уг ажиллагаан дахь Монгол Улсын цагдаагийн ажилтны орон тоог найм болгон нэмэгдүүлжээ.

Одоогоор дэлхий дээр явагдаж буй энхийг дэмжих 12 ажиллагаанаас цэрэг, цагдаагийн хүч, төсөв, хамрах хүрээгээрээ томоохонд тооцогдож буй UNMISS ажиллагаа нь БНӨСУ 2011 онд тусгаар тогтносноос хойш НҮБ-ын Аюулгүйн зөвлөлийн шийдвэрээр явагдаж эхэлсэн түүхтэй.

Эх сурвалж: ЦЕГ

Share