Ирланд улс Атлантын далайн алслагдсан арлуудын хүн амын бууралтыг зогсоох зорилгоор хуучин, эзэнгүй үл хөдлөх хөрөнгийг сэргээн ашиглахад чиглэсэн санхүүгийн дэмжлэгийн хөтөлбөр хэрэгжүүлж эхэллээ.

Энэхүү бодлого нь нийт 30 орчим арлын сууринд хамаарах бөгөөд Inis Mór зэрэг байршлууд багтаж байна. 

Эдгээр бүсийн нийт хүн ам 3,000 хүрэхгүй болж, залуу үе багассан нь уг бодлогыг хэрэгжүүлэх гол шалтгаан болжээ.

Хөтөлбөрийн хүрээнд оролцогчид 2008 оноос өмнө баригдсан, дор хаяж хоёр жил хоосон байсан байрыг худалдан авч, сэргээн засварлах тохиолдолд $92,000 хүртэлх буцалтгүй тусламж авах боломжтой. Дэмжлэгийн хэмжээ нь барилгын нөхцөл байдлаас шалтгаалан тогтоогдоно.

Засгийн газар уг бодлогоор дамжуулан орхигдсон барилгуудыг байнгын оршин суух эсвэл урт хугацааны түрээсийн зориулалтаар ашиглаж, орон нутгийн эдийн засаг, соёлын орчныг сэргээхийг зорьж буй.

Хөтөлбөр гадаадын худалдан авагчдад нээлттэй ч үл хөдлөх хөрөнгө эзэмших нь Ирландад оршин суух эрх олгох үндэслэл болохгүй. 

Иймээс сонирхогчид ажлын болон хөрөнгө оруулалтын виз зэрэг цагаачлалын шаардлагыг тусад нь хангах шаардлагатай юм.

Эх сурвалж: CBS News