АТГ-аас дөнгөж сая яаралтай хэвлэлийн хурал хийлээ. Тус албаныхан өнөөдөр үүсээд байгаа улс төрийн нөхцөл байдалд оролцоогүй гэдгээ хэлэв. Мөн улс төрчдөд хандан аливаа нэгэн улс төрийн явуургүй үйл ажиллагаанд АТГ-ыг дурьдаж, ямар нэгэн байдлаар татан оролцуулахаа зогсоо гэлээ. Тэд өнөөдрийг хүртэл хууль хяналтын байгууллагын ажлаа хуулийн хүрээнд хийж байгаа, ямар нэгэн байдлаар заавар зөвлөгөө ч авч байгаагүй гэв.

ЖДҮХС-ийн зээл авсан нэр бүхий хүмүүстэй холбогдуулан хэрэг нээсэн гэхдээ аль нэгэн улс төрчийн эсвэл намын захиалгаар хэн нэгнийг, гэр бүлийг нь хоморголон баривчилсан, цагдан хорьсон, албадлагын арга хэмжээ авсан зүйл байхгүй гэдгийг хариуцлагатайгаар мэдэгдлээ.

Авлигатай тэмцэх газрын Тамгын хэлтсийн дарга, эрхэлсэн комиссар З.Баасанням:

УИХ-ын болон Засгийн газрын гишүүд, улс төрийн нөлөө этгээдүүд зээл авсан эсэхийг нягтлан шалгаж байгаа. Дэлгэрэнгүй мэдээллийг хуулийн дагуу өгөх боломжгүй. Зөвхөн прокурорын зөвшөөрлөөр энэ хэргийн талаар нээлттэй мэдээлдэг. Өчигдөр зарим мэдээлэл гарсан. Эхний хэрэг нь ХХААХҮЯ-ын асан сайд Б.Батзоригийнх. Энэ хэрэг дээр эрүүгийн хэрэг үүсгэж яллагдагчаар татсан. УИХ-ын гишүүн Л.Оюун-Эрдэнэтэй холбогдуулан түүний хамаарал бүхий этгээдүүд ЖДҮХС-аас зээл авсан асуудлаар шалгагдаж байгаа. Цаашид хууль бусаар ЖДҮХС-аас зээл авсан газруудад хуулийн дагуу мөрдөн шалгах үйл ажиллагаа явуулна. 

Одоогоор ЖДҮ-ийн зээлийн асуудалтай холбогдуулан 6 хүнийг шалгаж байгаа. Эдгээр хүмүүс бол ЖДҮХС-аас зээл авсан гишүүд, улс төрийн хамааралтай хүмүүс биш. Харин ЖДҮХС-ийн үйл ажиллагааг хэрэгжүүлж байсан хүмүүсийг шалгаж эхэлсэн.

Үүний дараа сэтгүүлчид асуулт асуув.

-ЖДҮ-ийг хөгжүүлэх сангийн асуудлаар УИХ-ын хэчнээн гишүүнийг шалгаж байгаа вэ? УИХ-ын гишүүн Л.Оюун-Эрдэнийг шалгаж байгаа юу? 

 Ч.Жаргалбаатар: -АТГ-ын Мөрдөн шалгах хэлтсээс өнөөдөр энд яригдаж байгаа үйл явдалтай холбогдуулан эрүүгийн хэрэг нээн шалгаж байгаа. Нийслэлийн Прокурорын газраас 2018 оны 10 дугаар сарын 28-ны өдөр хэрэг бүртгэлтийн хэрэг нээж, харьяаллын дагуу АТГ-т ирүүлсэн. Мөрдөн шалгах ажиллагаа хуулийн дагуу явагдаж байгаа. Мөрдөн шалгах ажиллагаа тус бүрт прокурорын байгууллагаас хяналт тавьж ажиллаж байгаа. УИХ-ын гишүүн, Хүнс, хөдөө аж ахуй, хөнгөн үйлдвэрийн сайдаар ажиллаж байсан Б.Батзоригийг яллагдагчаар татаж 2018 оны 11 дүгээр сарын 5-ны өдөр мэдүүлэг авсан. Улстөрчдийн ямар нэгэн нөлөө нөлөөллөөр бусдыг баривчилсан, цагдан хорьсон явдал байхгүй гэдгийг хариуцлагатайгаар мэдэгдье.

УИХ-ын нэр бүхий гишүүд, Засгийн газрын нэр бүхий гишүүд, улс төрд нөлөө бүхий этгээдүүд, тэдний хамаарал бүхий этгээдүүд ЖДҮ-ийг хөгжүүлэх сангаас эрх мэдлээ урвуулан ашиглаж зээл авсан эсэх асуудлыг нягтлан шалгаж байгаа. Мөрдөн шалгах ажиллагааны талаар, үйлдэл тус бүрийн талаар, эзэн холбогдогчийн талаар дэлгэрэнгүй мэдээлэл өгөх боломжгүй. Эрүүгийн хянан шийдвэрлэх тухай хуульд зааснаар мөрдөн шалгах ажиллагааны нууцлалыг хангах үүрэгтэй. Прокурорын байгууллагын зүгээс мөрдөн шалгах ажиллагааны талаар ямар хэмжээнд мэдээлэл өгөхийг зөвшөөрсөн байна, тэр хэмжээнд зөвшөөрлийн үндсэн дээр бид мэдээлэл өгнө. Өчигдөр Нийслэлийн прокурор Д.Баярмагнай энэ талаар хэвлэлд мэдээлэл өгснийг та бүхэн мэдэж байгаа байх.

УИХ-ын гишүүн Л.Оюун-Эрдэнийн хамаарал бүхий этгээдүүд нь ЖДҮ-ийг хөгжүүлэх сангаас зээл авсан асуудлаар шалгагдаж байгаа. Цаашид мөрдөн шалгах ажиллагааг үргэлжлүүлж шаардлага хангахгүй аж ахуйн нэгжүүдэд зээл олгосон, улс төрд нөлөө бүхий этгээдүүдийн эрх нөлөөгөөр зээл авсан, зохих журмыг зөрчсөн хууль бус үйлдлийг илрүүлэн шалгана. Ар гэр, гэр бүлийн хүмүүсийг нь хоморголон баривчилсан, байцаасан, цагдан хорьсон, албадлагын арга хэмжээ аваагүй гэдгийг албан ёсоор хэлье.

-ЖДҮ-гийн асуудлаар 6 хүнийг баривчлан шалгаж байгаа гэж үнэн үү?

Ч.Жаргалбаатар: -Нэр бүхий 6 хүнийг цагдан хорьж мөрдөн шалгах ажиллагаа явуулж байгаа талаар прокурорын байгууллагаас мэдээлсэн. Энд улс төрийн албан тушаалтан болон тэдгээрийн хамаарал бүхий этгээдүүд байхгүй. Тухайн үед ЖДҮ-ийг хөгжүүлэх сангаас зээл олгох эрх мэдлийг хэрэгжүүлж байсан яамны Төрийн нарийн бичгийн дарга зэрэг албан тушаалтнуудыг цагдан хорьж шалгаж байгаа.

2018 оны 10 дугаар сарын 28-ны өдөр хэрэг бүртгэлтийн хэрэг нээсэн цагаас эхэлж мөрдөн шалгах ажиллагаа тасралтгүй явагдаж байгаа. Мөрдөн шалгах ажиллагааны асуудлаар дэлгэрэнгүй мэдээлэл өгөх боломжгүй.

-Засгийн газрыг огцруулах цаг үетэй давхцаж байгаа учраас АТГ-ыг улс төрийн нөлөөнд автаж байна гэсэн хардлага байгаа. Энэ талаар юу хэлэх вэ? 

З.Баасанням: -Ямар нэгэн улс төрийн нам, хүчин, хүн, албан тушаалтны нөлөө, зааварчилгаа байхгүй гэдгийг дахин хэлье. Би түрүүн хэлсэн. Улс төрийн нөхцөл байдалтай уялдуулан мөрдөн шалгах ажиллагаа явуулаагүй. УИХ-ын гишүүдийг олноор нь дуудаагүй, ар гэрийн хүмүүст нь албадлагын арга хэмжээ аваагүй. АТГ-ын үйл ажиллагааг улс төрийн үйл ажиллагаандаа битгий хутгаач ээ гэдгийг дахин хэлье.

-Улс төрд нөлөө бүхий этгээд гэж та сая хэллээ. Эдгээр нь ямар хүмүүс юм бэ? 

Ч.Жаргалбаатар: -2015 оноос хэрэгжиж эхэлсэн Эрүүгийн хуульд энэ нэр томъёог оруулж өгсөн. Үүнээс өмнө улс төрд нөлөө бүхий этгээдүүд эрүүгийн хариуцлага хүлээлгэх эрх зүйн үндэслэл байгаагүй. Улс төр дэх нөлөөгөө ашиглаж гэмт хэрэг үйлдээд байгаа тохиолдлыг ойлгоно. Эрүүгийн хуулийн 21 дүгээр зүйлд энэ тухай тайлбарласан байгаа. Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд ийм ийм этгээдүүдийг улс төрд нөлөө бүхий этгээдүүд гэнэ гээд маш олон албан тушаалтнуудыг зааж өгсөн.

Share