Олон улсын тээврийн жолооч 21 хоног тусгаарлагдасны дараа буюу гэртээ очоод 4 хоногийн дараа коронавирус илэрсэн байна. Мөн түүний эхнэрээс коронавирус илэрсэн нь шинжилгээгээр батлагджээ. Халдвар илэрсэн хүмүүсийг ХӨСҮТ-д тусгаарласан гэв.

Иймээс Улсын онцгой комисс яаралтай хуралдаж,  нийслэлээс гарах хөдөлгөөнийг хязгаарлаж, 3 хоногийн хугацаанд сургууль, цэцэрлэгийг хаах шийдвэр гаргасан байна. 

Улсын Онцгой комиссын 2020 оны 11 дүгээр сарын 11-ний өдрийн 12 дугаар тушаалаар коронавируст халдвараас урьдчилан сэргийлэх зорилгоор нийслэлээс гарах хот хоорондын зорчигч тээвэр болон хувийн тээврийн хэрэгсэл, орон нутгийн хуваарьт нислэг, суудлын галт тэрэгний хөдөлгөөнийг 11 дүгээр сарын 11-ний өдрийн 02:00 цагаас 11 дүгээр сарын 13-ны 23:00 цаг хүртэл түр хугацаагаар зогсоолоо.

Мөн нийслэлийн бүх шатны боловсролын байгууллага, сургалтын төвийн үйл ажиллагааг 2020 оны 11 дүгээр сарын 11-ний өдрөөс 14-ний өдрийг хүртэл, үзвэр үйлчилгээний байгууллагууд болон олон нийтийг хамарсан хурал цуглаан, сургалтын, спортын тэмцээн уралдаан, соёл урлаг, кинотеатр, цахим болон бага насны хүүхдийн төрөл бүрийн тоглоомын газрын үйл ажиллагааг түр зогсоох шийдвэрийг тус тус гаргалаа гэж Онцгой байдлын ерөнхий газраас мэдээллээ.

Share