Өнөөдөр НҮБ-ын Хүүхдийн эрхийн конвенцийг батлагдсаны 29 жилийн ой тохиож байна.

Монгол Улс тус конвенцид нэгдэж ороод 28 жил болжээ. Тус өдрөөр буюу 2018 оны 11 дүгээр сарын 20-нд Монгол Улсын Хүний эрхийн Үндэсний Комиссын шийдвэрээр Баянзүрх дүүргийн 33 дугаар сургуулийн багш Г.Пүрэвбаярыг залуу үеийг хүний эрхийн мэдрэмжтэй, хариуцлагатай, хүмүүнлэг иргэн болгон төлөвшүүлэх, сурган хүмүүжүүлэх үйлсэд оруулж буй хувь нэмрийг үнэлж Монгол Улсын Хүний эрхийн Үндэсний Комиссын дээд шагнал болох "Хүний эрх” тэмдгээр шагналаа. 

Шагналыг Монгол Улсын Хүний эрхийн Үндэсний Комиссын дарга Ж.Бямбадорж гардуулан өгөхдөө "Анги бүлгээрээ нэг нэгнээ гэсэн сэтгэлтэй, нэг айлын хүүхэд мэт халуун дулаан, хүний эрхийн мэдрэмжтэй хүмүүс болгож хүмүүжүүлэхэд удирдан чиглүүлж буй анги удирдсан багшийг ХЭҮК-ын дээд шагналаар шагнах болсны учир нь өнөөгийн нийгэмд ийм багш, сурган хүмүүжүүлэгчид улам олон байгаасай. Багш бүхэн хүний эрхийн мэдрэмжтэй ажиллаж, хүүхдийн дээд эрх ашигт нийцүүлэн ажиллаж хэвшээсэй хэмээн уриалах гэсэн юм” гэв.

Улсын тэргүүний 33 дугаар сургуулийн 7е анги 49 хүүхэдтэй бөгөөд тус ангийн суралцагч Б.Уранбат хүү нэгэн эмээгийн гээгдүүлсэн үнэт эдлэл бүхий хэтэвчийг эзэнд нь эргүүлэн олж өгч тусалсан тул хүүд "Дэлхийн түүхийг бүтээсэн 100 үйл явдал” номыг ХЭҮК-ын гишүүн П.Оюунчимэг гардуулан өгч, ирээдүйд сайн хүн болохыг хүсэн ерөөлөө. 

Г.Пүрэвбаяр багшийн ангийнхаа охин О.Ундралын эмчилгээний зардалд зориулан гар урлалын эд зүйлс хийж худалдан хандивын аян зохион байгуулж, олон нийтийг тус аянд нэгдэхийг уриалж байгаа тул Хүний эрхийн Үндэсний Комиссын хамт олон нэг сая төгрөгийг цалингаасаа хандивласныг ХЭҮК-ын Ажлын албаны дарга Ч.Алтангэрэл мөн энэ үеэр ангийн багшид гардуулан өгсөн юм. 

Тус сургуулийн захирал Н.Энхбат болон "Хүний эрх” тэмдгийн эзэн багш Г.Пүрэвбаяр нар ХЭҮК-ын удирдлагуудыг ирж, шагнал гардуулна гэж төсөөлөөгүй байсан тухайгаа ярьж, "Манай сургууль дээр ямар нэг зодоон цохион муу зүйл тохиолдвол хэвлэлийнхэн ирдэг. Сурагчид амжилт гаргаад, тэмцээн, уралдаанаас медаль авлаа гэсэн эерэг мэдээллийг сонирхдоггүй. Энэ аянг зохион байгуулахад оролцож эерэг мэдээллийг түгээж байгаа сэтгүүлчдэд баярлалаа. Бидний ажилд их урам, дэм өглөө” хэмээн ярьж байлаа.

Хүүгийн энэхүү үйлсийг анх ээж нь нийгмийн сүлжээнд хуваалцсан бөгөөд үүнийг нь сонссон нэгэн бүсгүй сайхан сэтгэлт хүүд 2 сая төгрөг төгрөг өгчээ. Харин хүү шагналынхаа мөнгөө ангийнхаа хүүхдийн эмчилгээний зардалд хандивласан байна. Энэхүү хагалгааг хийлгэхэд Ундрал охинд 100 гаруй сая төгрөг хэрэг болоод байгаа аж.

Share