Баянзүрх дүүргийн 10 дугаар хорооны оршин суугч, 60 гаруй настай, ахмад төмөр замчин С.Хишигт гуай 2018 оноос эхлэн гэрээрээ номын сан ажиллуулж, ойр орчмынхоо сурагч багачуудад олон төрлийн сонирхолтой номоор үйлчлэх болжээ. Хүүхдийн ирээдүйн төлөө хийж буй түүний сайн үйлсийг дэмжиж БСШУС-ын сайд Ё.Баатарбилэг зөөврийн компьютер бэлэглэлээ.

Энэ үеэр сайн дурын номын санч  С.Хишигт гуай “Сүүлийн үеийн хүүхдүүдийг ном уншихаа больсон гэж ярьдаг. Үнэндээ аав, ээжүүд нь анхаарч, ном авч өгч, хамтдаа уншиж, урамшуулж чадахгүй байна. Хүүхдэдээ гар утас авч өгөлгүй яах вэ, гэхдээ заавал номтой нөхөрлүүлж, энэ их цахим давалгаанаас хамгаалах хэрэгтэй” хэмээлээ.

Өнөөдрийг хүртэл номын бүртгэлээ дэвтэр дээр хөтөлж ирсэн С.Хишигт гуай компьютертэй болсондоо баяртай буйгаа илэрхийлж, маргаашаас компьютерийн сургалтад хамрагдаж, номын бүртгэлийн программ дээр ажиллаж сурна гэсэн юм. 


Эх сурвалж: БСШУСЯ