Нийслэлийн түгжрэлийг бууруулах ажлын хэсэг хотын төвийг “A, B, C” гэсэн гурван бүсчлэлд хуваах шийдвэр гаргасан. Энэ талаар өнөөдөр Замын хөдөлгөөний удирдлагын төв НӨҮГ-ын дарга Д.Одбаяр, Замын хөдөлгөөн төлөвлөлт, зохицуулалт, инженерчлэлийн газрын дарга С.Энхтөр, Авто замын хөгжлийн газрын орлогч дарга Б.Индра нар мэдээлэл хийлээ.

Хотын төвийн A, B бүсчлэлд багтаж байгаа газруудад өнөөдрийн байдлаар нийт 2382 машины зөвшөөрөлтэй зогсоол, зөвшөөрөлгүй буюу байгууллагууд өөрсдөө хаасан 5330 машины зогсоол байгаа аж. Шинээр 7384 машины зогсоол гаргахаар судалж буй бөгөөд ингэснээр нийт 15696 машины зогсоолыг бий болгохоор төлөвлөжээ.

Энэ үеэр Замын хөдөлгөөн төлөвлөлт, зохицуулалт, инженерчлэлийн газрын дарга С.Энхтөр “Бид энэ зогсоолуудыг бүгдийг нь төлдбөртэй болгоно. Авто машины зогсоол дээр зогсох машинуудад шинэ журам үйлчилж эхэлнэ. Төр захиргааны болон худалдаа үйлчилгээний байгууллагын ажилчид ажлынхаа ойр орчмын зогсоол дээр өдөржин машинаа байрлуулдаг. Үйлчлүүлэхээр ирсэн иргэдэд зогсоол олддоггүй. 

Зогсоол хайж байгаа жолооч нар дунджаар 500 м замыг 30 минутад маш бага хурдтай явж өнгөрүүлдэг. Энэ нь түгжрэл үүсэх шалтгааныг 15 хувиар нэмэгдүүлдэг. Хотын төвд байгаа нэг зогсоолыг жишээ аваад бүтэн өдөр тандаж үзэхэд 70 орчим машинаас 10 удаагийн сэлгэлт л хийгдэж байна. Бусад нь өглөө ирээд орой болтол ямар ч хөдөлгөөнгүй зогсож байгаа юм” хэмээлээ.

Зогсоолын асуудлаас гадна A, B бүс рүү техникийн улсын үзлэгт тэнцсэн, татвараа төлсөн, торгуулгүй жолооч нарыг зорчуулах юм байна. Бүсчлэлийг зөвхөн ажлын цагаар хэрэгжүүлнэ. Бүсчлэлийн тэмдэг тэмдэглэгээг тавьж өгнө. Зөрчсөн тохиолдолд Замын хөдөлгөөний дүрэмд заасны дагуу тэмдэг тэмдэглэгээг зөрчсөн гэж үзэн хариуцлага хүлээлгэх аж. Бүсчлэлийн талаар иргэдээс санал асуулга авахад 70 гаруй хувь нь дэмжсэн байна.

Түүнчлэн нийтийн тээврийн үйлчилгээ, хүртээмжийг сайжруулж, иргэдийн нийтийн тээврээр зорчих боломжийг бүрдүүлж өгөх юм байна.

Энэ талаар С.Энхтөр “Бүсчлэлийн бэлтгэл ажлыг энэ сард дуусгаж, ирэх сард нэвтрүүлнэ. Эхний саруудад цагдаа нар А, В бүсүүдэд хатуу хяналт тавина. Бүс рүү нэвтрэх камержуулах зэргээр механик ажлыг бууруулна. Энэ шийдвэртэй холбогдуулан Татварын ерөнхий газар, Авто тээврийн үндэсний төв илүү хариуцлагатай ажиллан, жолооч нарын торгуулийг шуурхай төлүүлэх,тээврийн хэрэгслийн бүрэн бүтэн байдлыг хангуулах арга хэмжээ авна.

А, В бүс рүү ороход дарга цэргийн ялгаа байхгүй. Даргын машин гэхээр төлбөргүйгээр зогсоол дээр байршина гэсэн үг биш.  Шуурхай алба, хэвлэл мэдээллийн, бүрэн цахилгаан машинууд, нийтийн тээвэр чөлөөтэй нэвтэрнэ. Замын хөдөлгөөний журамд ямар ч өөрлчлөлт орохгүй.

Энэ шийдвэр хэрэгжиж эхэлснээр хотын захын замуудад нэмэлт ачаалал үүсэхгүй. Хотын захиргааны бүх байгууллага ажлын хэсэгт оролцсон. Сөрөг хандлагаас айгаад яваад байвал түгжрэл улам өснө. Замаа өргөсгөөд л байвал машин нэмэгдээд л байна” хэмээв.

Мэдээллийг дүрс бичлэгээр бүрэн эхээр нь хүргэж байна.


Эх сурвалж: Нийслэлийн ЗДТГ-ын Хэвлэл мэдээлэлтэй харилцах хэлтэс