Эрүүл мэндийн сайд Д.Сарангэрэл, Нийслэлийн Засаг дарга С.Амарсайхан тэргүүтэй холбогдох албаныхан өнөөдөр Яармагт баригдаж буй 300 ортой Нийслэлийн эх, хүүхдийн нэгдсэн эмнэлэгийн барилгын ажлын явцыг шалгаж, газар дээр нь ажиллалаа.

“Нийт долоон блокоос бүрдсэн 34.200 метр.кв, 2.4 га талбай бүхий эмнэлгийн барилгын ажлын явц 95 хувьтай явж байгаа”-г барилгын ажлыг гүйцэтгэгч “Томо Бюлдинг” ХХК-ийн гүйцэтгэх захирал М.Отгонбаяр хэллээ. Тус компанийн хувьд эхний ээлжид хоёр блокийг ашиглалтад оруулахаар ажиллаж байгаа юм.

Энэ үеэр нийслэлийн Засаг дарга С.Амарсайхан “Нийслэлийн зүгээс шаардлагатай зам, орц, гарц, дэд бүтцийн асуудлуудыг цаг алдалгүй хийж, үйл ажиллагаа явуулах бэлтгэлийг хангахад анхаарч ажиллаж байна. Өмнө нь би ирж ажиллахдаа Эрүүл мэндийн сайд, Засгийн газарт танилцуулаад энэ асуудал шийдэгдэх шатандаа явж байна. Мэдээж барилга байгууламж барьж дуусах нэг асуудал, үүний цаана тоног төхөөрөмж гээд олон ажил бий. Энэхүү эмнэлэг Эх, хүүхдийн эрүүл мэндийн үндэсний төв болон дүүргүүдийн эмнэлгийн ачааллыг асар ихээр хуваалцах юм. Нийслэлийн эх, хүүхдийн эрүүл мэндийн төвийг хоёрдугаар улиралдаа багтаагаад ашиглалтад оруулах боломж байгаа гэж үзэж байна. Нэг өдөр, нэг цагийн өмнө энэ эмнэлгээ ашиглалтад оруулах шаардлага бидэнд бий” гэлээ.

 

Эрүүл мэндийн сайд Д.Сарангэрэл “Энэ эмнэлгийн барилгын ажил санхүүжилтээс болж 10 жил болсон. Бид Засгийн газрын хуралдаанаар нэмэгдэл 13 тэрбум төгрөгийн асуудлыг шийдвэрлэлээ. Мөн зөвхөн барилгын санхүүжилтийг шийдвэрлээд зогсоогүй, эмнэлэгт шаардлагатай тоног төхөөрөмжийн санхүүжилтийг шийдвэрлэж чадлаа. Дэлхийн банк, Сангийн яамтай 26.9 сая ам.долларын гэрээнд гарын үсэг зурсан. УИХ ирэх долоо хоногт гэрээний асуудлыг батална. Энэ хүрээнд 10 гаруй сая ам.долларын төхөөрөмжөөр 300 ортой Нийслэлийн эх, хүүхдийн нэгдсэн эмнэлгийг тоноглох нөхцөл боломжийг бүрдүүлж байгаа юм” гэдгийг онцоллоо.

Барилгын ажлын явцын өдөр тутмын ажилд Барилгын хөгжлийн төв хяналт тавин ажиллаж байгаа аж. Энэ үеэр нийслэлийн Засаг дарга С.Амарсайхан “Барилгын ажлын гүйцэтгэгч компани дутуу гүйцэтгэлээ хийхийн хажуугаар цэвэрлэгээгээ хийх ёстой. Барилгын хөгжлийн төв хяналтаа маш сайн тавих хэрэгтэй. Нийслэлийн Эрүүл мэндийн газар мөн хяналтаа тавиад ажиллана. Ямар нэгэн байдлаар дутуу ажил үлдээж болохгүй. Нийслэлийн эх, хүүхдийн нэгдсэн эмнэлгийг энэ цаг хугацаанд яаралтай ашиглалтад оруулах шаардлага байгаа. Төсөв хөрөнгийн асуудлыг шийдвэрлэчихсэн байгаа учир бүх асуудал та бүхнээс шалтгаална. Иймд ажлаа маш сайн, хурдан шуурхай хийх хэрэгтэй” хэмээн санууллаа.

 

Share