Шинэ коронавирустэй холбоотой асуудлаар Эрүүл мэндийн яам болон холбогдох албаныхан өнөөдөр мэдээлэл хийлээ.

Энэ үеэр ХӨСҮТ-ийн захирал Д.Нямхүү "Энэ сарын 10-нд Хөвсгөл аймагт тусгаарлагдсан нэг хүний шинжилгээний хариу сөрөг буюу коронавирусийн халдваргүй гарсан. Мөн энэ сарын 10-нд Гашуунсухайт боомтоор орж ирсэн 12 хүний шинжилгээний сорьц ХӨСҮТ-д ирсэн нь халдваргүй гарсан. Эдгээр хүмүүсийг 14 хоног тусгаарлан, ажиглалтыг үргэлжлүүлнэ.

Энэ сарын 11-нд нийт 7 хүн тусгаарлагдсан. Тодруудбал, ХӨСҮТ-д нэг, Сүхбаатар дүүрэгт нэг, Баян-Өлгий аймагт нэг, Сүхбаатар аймагт хоёр, Замын-Үүдэд хоёр хүнийг сэжигтэй тохиолдол гэж тусгаарласан. Эдгээр 7 хүний шинжилгээ хийгдэж байна. 

Ухань хотоос ирсэн оюутнуудын тусгаарлагдах хугацаа дуусах дөхөж байна. Бүгдийнх нь биеийн байдал сайн, ямар нэгэн шинж тэмдэг илрээгүй, сэтгэл санаа нь өндөр байна" хэмээн мэдээллээ.

Share