Шинэ коронавируст халдварын эрсдэлээс сэргийлэх, цаашид ямар арга хэмжээ авах талаар Засгийн газар өнөөдөр ээлжит бусаар хуралдан шийдвэр гаргалаа. Энэ талаар Шадар сайд, Улсын онцгой комиссын дарга Ө.Энхтүвшин болон холбогдох сайд нар мэдээлэл хийв. 


Эрсдэл өндөр байгаа учир их, дээд сургууль, Мэргэжлийн сургалт, үйлдвэрлэлийн төв болон олон улсын хүүхдийн “Найрамдал” төв-ийн үйл ажиллагааг 2020 оны 03 дугаар сарын 02-ныг хүртэл зогсоосон байна. 

Мөн хилийн боомтуудаар орж гарч байгаа зорчигч, автотээврийн хөдөлгөөнийг даваа гарагаас хязгаарлахаар боллоо. Үүнд төмөр зам болон агаарын тээврийн салбар хамаарахгүй юм. БНХАУ-ын Ухань хотод байгаа 31 иргэнээ ойрын хугацаанд татаж авахаар болжээ. 

Олон нийтийг хамарсан урлаг, соёл, спорт, хурал, сургалтын арга хэмжээг бүхэлд нь хориглосон бөгөөд үүнд сургалтын төвүүд, жолооны дамжаа ч багтаж байна.  

Эмнэлгийн тусламж, үйлчилгээний бэлэн байдлыг хангах, халуун хэмжих багаж хэрэгсэл, бусад тоног төхөөрөмж, эрүүл мэндийн байгууллагын ажилтнуудын нэмэлт цалин, ариутгал, халдваргүйжүүлэлтийн бодис зэргийг худалдан авах хөрөнгийг Засгийн газрын нөөц сангаас гаргах юм. 

2020 оны 01 дүгээр сарын 26-ны 12.00 цагийн байдлаар коронавируст халдвараар 1965 хүн өвчилсөн байсан  бол цаг гаруйн дараа 2001 болж нэмэгдэж 56 хүн нас бараад байна. Иргэд гараа тогтмол савандаж угаах, амны хаалт заавал зүүх, өвчлөл гарсан улсад зорчихгүй байх нь халдвараас сэргийлэх хамгийн энгийн арга гэдгийг Эрүүл мэндийн яам зөвлөж байна гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Хотын дарга С.Амарсайхан "Томуугийн дэгдэлт их байгаатай холбогдуулан өмнө нь нийслэлийн ЕБС-иудын амралтын хугацааг долоо хоногоор сунгасан. Уг журмыг гадаадын хөрөнгө оруулалттай зарим хувийн сургууль дагаж мөрдөөгүй байсныг мөрдүүлэх арга хэмжээ авсан. Энэ удаагийн хорио цээрт Монгол Улсын нутаг дэвсгэрт үйл ажиллагаа явуулж буй холбогдох бүх байгууллагууд хамрагдана" гэдгийг онцолж хэллээ.

Өнгөрсөн баасан гарагт Улсын онцгой комисс хуралдаж, төр, хувийн өмчийн бүх цэцэрлэг, ЕБС-ийн үйл ажиллагааг гуравдугаар сарын 02-ныг хүртэл зогсоосон юм.

БНХАУ-ын Цагаан сар энэ сарын 25, 26, 27-нд тохиож буй учир дээрх өдрүүдэд хилийн боомтууд амарч буй. Үргэлжлүүлэн даваа гарагаас хилийг хаах аж.