Италийн хойд нутагт хурдны зам дээр ачааны тэрэг дэлбэрсний улмаас 2 хүн амь үрэгдэж, олон арван хүн бэртэж гэмтсэн тухай телевизийн “Эн-Эйч-Кэй” суваг мэдээлэв.

Дэлбэрэлт тус улсын Бологна хотын олон улсын нисэх буудлын ойролцоо болжээ. Шатамхай материал ачиж явсан ачааны тэрэг өөр нэг автомашинтай мөргөлдсөний улмаас уг осол гарсан байна.

Ойр орчмын хяналтын камерын дүрс бичлэгийг шалган үзэхэд, ачааны тэрэг урдаас ирж буй тээврийн хэрэгслийг мөргөсөн ба тэр даруйд маш хүчтэй дэлбэрэлт болжээ. Ослын газарт гал дүрэлзэн асч буй нь дүрс бичлэгт тод харагдаж байсан аж.

Дэлбэрэлтийн улмаас хурдны замын хэсэг эвдэрч, гал автомашины зогсоол дахь тээврийн хэрэгслүүд рүү тархжээ. Орон нутгийн мэдээллийн хэрэгслүүдийн мэдээлснээр, дэлбэрэлтийн улмаас 60 гаруй хүн бэртэж гэмтсэн бөгөөд тэдний дотор ослын газарт ажиллаж байсан цагдаагийн ажилтнууд байсан байна.



Эх сурвалж: МОНЦАМЭ агентлаг


Share