ТЕХРАН. /Sputnik/. Ираны нийслэл Техран хотноо өчигдөр болсон Иран-Камбожийн хөл бөмбөгийн шигшээ багийн тоглолтыг Ираны эмэгтэйчүүд үзэж сонирхжээ. Тэд хөл бөмбөгийн тэмцээнийг цэнгэлдэх хүрээлэнд 40 гаруй жилийн дараа анх удаа үзэж буй нь энэ юм.

Өнгөрсөн есдүгээр сард Ираны иргэн, хөл бөмбөг сонирхогч бүсгүй Сахар Ходаяри өөрийгөө галдан шатаасан хэрэг гарсантай холбогдуулан Олон улсын хөл бөмбөгийн холбоо /FIFA/ эмэгтэйчүүдийг хөл бөмбөгийн цэнгэлдэх хүрээлэн рүү нэвтрэхийг зөвшөөрөхийг Ираны хөл бөмбөгийн холбоонд уриалсан байна.

Хөл бөмбөгийн дэлхийн аварга шалгаруулах тэмцээний сонгон шалгаруулах тэмцээнд Ираны шигшээ баг Камбожийг 14-0 онооны харьцаагаар буулган авсан бөгөөд уг тоглолтыг олон мянган эмэгтэй үзжээ. Бүрээ үлээж, төрийн далбаагаа барьсан тэд Ираны шигшээ багийг ялалт байгуулахад ихээхэн хувь нэмэр оруулсан байна. Эмэгтэйчүүдэд зориулан 4600 тасалбарыг худалдаанд гаргажээ. 

Эх сурвалж: Монцамэ агентлаг

Share