Өнгөрсөн оны зургадугаар сард Иранд болсон террорист халдлагуудтай холбоотой гэх хэргээр лалын босогчдын “Лалын улс” бүлэглэлийн найман гишүүнд Ираны шүүх цаазын ял оноожээ. Энэ тухай “Ройтерс” агентлаг мэдээлэв.

Зэвсэгт этгээдүүд өнгөрсөн онд Ираны парламентын ордон болон хувьсгалын удирдагч Аятолла Рухолла Хомейнийн бунхан руу халдсан юм. Халдлагын үеэр зэвсэгт этгээдүүд болон Ираны аюулаас хамгаалах хүчнийхний хооронд буудалцаан болсноор 17 хүн амиа алдаж байв.

Ираны аюулаас хамгаалах хүчнийхний мэдэгдсэнээр, уг халдлагын үеэр амиа алдсан хүмүүсийн тав нь лалын шашны суннитын урсгалыг шүтэгч “Лалын улс” бүлэглэлийн гишүүд байжээ.

Уг халдлага нь хүн амынх нь дийлэнх лалын шашны шиит урсгалыг шүтдэг Иран улсыг бүхэлд нь цочролд орруулсан юм. Иран улс нь “Лалын улс” бүлэглэлийн эсрэг тэмцэхэд Сири болон Иракт дэмжлэг үзүүлсээр ирсэн билээ.



Эх сурвалж: МОНЦАМЭ агентлаг