Манай улсын бахархалт шувуу гэгддэг идлэг шонхорыг арилжааны зорилгоор гадаадад гаргахыг хориглосон ч хууль бусаар агнагдаж тоо толгой нь буурсаар байна. Сүүлд хийсэн судалгаагаар 18 мянга орчим идлэг шонхор байгаа нь тогтоогджээ. Энэ нь арваад жилийн өмнөхөөс даруй хоёр мянгаар буурсан дүн юм. Дэлхий дахинд ч бас идлэг шонхрын тоо 40 хувиар буурсныг шувуу судлаачид өчигдөр болсон хуралдаанаар онцолсон байна. Хэрвээ энэ эрчээрээ шувууны тоо толгой хорогдсоор байвал 5-10 жилийн дотор “ховор” амьтны жагсаалтад бүртгэгдэх хэмжээнд хүрнэ хэмээн албаныхан эмзэглэж байна. Идлэг шонхрыг олноор барьж, гадаадад гаргах, өндөр хүчдэлийн шугамын засварын үеэр үүр нь эвдэгдэн өндөг сүйтгэгдэх мөн өндөр хүчдэлийн шугамд цохиулах зэрэг нь тоо толгой буурахад нөлөөлжээ.

Үүнтэй холбоотойгоор Дэлхийн байгаль хамгаалах сангийн мэргэжилтнүүд болон шувуу судлаачид идлэг шонхрын тоог өсгөх зорилгоор ирэх онд цогц төлөвлөгөө боловсруулан ажиллахаар болсон байна