БАНДАР СЕРИ БЕГАВАН. /CNN/. Ижил хүйстнээ сонирхдог эрэгтэйчүүдэд цаазын ял ногдуулах шийдвэрээ цуцалсан тухай Бруней улсын Султан Хассанал Болкиах мэдэгдсэн байна.


Брунейд өнгөрсөн сарын эхээр лалын шашинт шинэ хуулийг олон нийтэд танилцуулсны дунд ижил хүйстнээ сонирхсон, гэр бүлээс гадуур харилцаа үүсгэсэн, хүчингийн хэрэг үйлдсэн хүмүүсийг чулуугаар цохиж амийг нь хөнөөх харгис хэрцгий шийтгэл багтаж байсан юм. 


Энэхүү явдлын дараа Жорж Клуни, Элтон Жон тэргүүтэй алдартнууд болон хүний эрхийг хамгаалагчид уг шинэ хуулийг эсэргүүцэн өргөн цар хүрээг хамарсан кампанит ажил өрнүүлж, Брунейн Султаны эзэмшдэг зочид буудлуудыг бойкотолж эхэлжээ. 

“Ижил хүйстнүүдэд цаазын ял ногдуулахгүй” гэж Х.Болкиах өнгөрсөн ням гарагт мэдэгдсэн байна. 


Хүний эрхийг хамгаалах кампанит ажлын ахлагч Жан Фридберг дээрх шийдвэрийн талаар хэлэхдээ, маш чухал алхам боллоо гэжээ. Гэсэн хэдий ч шинэ хуулийг бүхлээр нь цуцлах хэрэгтэйг тэрбээр онцолжээ. 

Борнео арал дээр оршдог, нефть, хийн экспортоор хөгжиж буй Бруней улсыг Султан Х.Болкиах удирддаг юм. Тэрбээр өдгөө 72 настай бөгөөд Брунейн Хөрөнгө оруулалтын агентлагийг удирддаг аж. Энэхүү байгууллага нь дэлхийн хамгийн шилдэг зочид буудлууд болох Лондон хотын “Dorchester”, Лос-Анжелес хотын “Beverly Hills” зэрэг буудлыг эзэмшдэг ажээ.

Эх сурвалж: Монцамэ агентлаг

Share