Төрийн албаны шинэ хуульд заасан хяналт, шалгалт, хүний нөөцийн аудит хийх чиг үүргийн хүрээнд Төрийн албаны зөвлөл эхний төлөвлөгөөт хяналт шалгалтыг Байгаль орчин аялал жуулчлалын яамнаас эхэлжээ.

Төрийн албаны зөвлөлийн хяналт, шалгалтын баг өнөөдөр Байгаль орчин, аялал жуулчлалын яаманд дүнг танилцууллаа.

Шалгалтаар томилгооны зөрчилтэй буюу хууль бус томилгоотой 45 албан хаагч тус яам, харьяа төрийн захиргааны байгууллагуудад ажиллаж байгаа гэсэн зөрчил илэрчээ.

Томилгоотой, хүний нөөцтэй холбоотой бусад зөрчлүүдийг дурдвал, Төрийн захиргааны албан тушаалд хууль бусаар томилсон, орон тоогоо хэтрүүлэн илүү хүн ажиллуулсан, Засгийн газрын 2007 оны 354-р тогтоолоор батлагдсан ангилал зэрэглэлийг дураараа өөрчилсөн. Байхгүй албан тушаалыг гаргаж томилсон, жирэмсний болон амаржсаны хүүхэд асрах чөлөөтэй байгаа иргэний оронд авсан хүнийг жинхлэн томилж, төрийн албан хаагчийн тангараг өргүүлсэн зэрэг зөрчлүүд илэрсэн байна.

Төрийн албаны зөвлөлийн гишүүдийн хэлж байгаагаар хууль бус томилгоо бүрийн ард эрх ашиг байгаа гэсэн бол Байгаль орчин аялал жуулчлалын яамны Төрийн нарийн бичгийн дарга Ц.Цэнгэл энэ удаагийн шалгалт “манай яамны байгаа байдлыг уудлан дэлгэлээ. Хууль бус томилгоо нь улс төрийн  нөхцөл байдлаас шалтгаалаад олон жил болж байгаа тухай хэлээд гаргасан алдаа дутагдлыг залруулна” гэдгээ мэдэгдлээ.

Төрийн албаны зөвлөлөөс Байгаль орчин аялал жуулчлалын яаманд хоёр тогтоол бүхий зөвлөмжийг хүргүүлсэн бөгөөд эдгээр зөрчлийг арилган долдугаар сарын 09-ны дотор Төрийн албаны зөвлөлд тайлагнаж мэдээлэхийг тус яамны эрх бүхий албан тушаалтнуудад үүрэг болголоо.

Share