Нурж унах шахаад байсан түүхэн дурсгалт байшин, Сайн ноён хан Т.Намнансүрэнгийн амьдарч байсан “Гоожингийн өндөр” барилгыг дахин сэргээхээр болоод байгаа аж.

Баянзүрх байрлах уг байшингийн талаар Асашёорюү Д.Дагвадорж хэдхэн хоногийн өмнө "Монгол улс болон Улаанбаатар хотын түүхэн үнэт байшингийн өнөөгийн нүүр царай! Даанч дээ нээрээ!" хэмээн өөрийн фэйсбүүк хуудастаа бичсэн нь дахин олны ярианы сэдэв болсон юм.  Тэгвэл уг асуудал дээр Монголын Архитехторын эвлэл мэдэгдэл хийжээ. Энэхүү бичигт "Бид түүхэн дурсгалт байшинг нураах шийдвэрийг үргэлж эсэргүүцэж ирсэн. Цагтаа Гоожингийн өндөр  хэмээн нэрлэгдэж байсан энэхүү түүхэн байшинг сэргээн засварлах санаачилга гарган хөдөлгөөн өрнүүлж байгааг дэмжиж байна" хэмээн бичсэн байна.


Уг барилгыг Сайн ноён хан Т.Намнансүрэн Орос улсад айлчилж ирээд бариулсан түүхтэй. Энэхүү байшинг Оросын цэргийн сургагч нарын байр, Жанжин Д.Сүхбаатарын өрөө, улс төрийн зүтгэлтэн Ю.Цэдэнбалын гэр, оюутны байх гээд олон төрлөөр ашиглагдаж иржээ.