УИХ-ын гишүүн асан, Ардчилсан намын дэд дарга Г.Батхүү зуурдаар нас барсан харамсалтай хэрэг өчигдөр гарсан. Талийгаач нь Төрийн ордонд явж байгаад гэнэт зүрх нь зогсон ухаан алдаж унасан гэх мэдээлэл цацагдаад буй.

Үүнтэй холбоотойгоор Ардчилсан намаас Г.Батхүү Төрийн ордонд учир битүүлгээр нас барлаа гэсэн утга бүхий мэдэгдэл гаргажээ.

Мэдэгдлийг бүрэн эхээр нь хүргэж байна.

МЭДЭГДЭЛ

Ардчилсан Намын Дэд дарга Гаваагийн Батхүү нь 2019 оны 5 дугаар сарын 17-ны өдөр 19 цагийн орчим Төрийн ордонд учир битүүлгээр амь насаа алдсан цочирдом үйл явдал боллоо.

Тэрээр тухайн өдөр Төрийн ордонд болсон “Торгоны зам” олон улсын автораллиг зохион байгуулах ажлын хэсгийн хуралд 15.00-18.00 цагийн хооронд оролцсон юм.

Төрийн тусгай хамгаалалттай, онцгой объект болох Төрийн ордны баруун жигүүрт өндрөөс унасан байх магадлалтай, амь насаа алдсан нь гадны нөлөөтэй байж болзошгүй гэсэн хардлагыг төрүүлж байна. Төр нийгмийн зүтгэлтэн агсан учир битүүлгээр амь насаа алдсан энэ хэргийн талаар холбогдох хууль хяналтын байгууллага одоог хүртэл тодорхой мэдээлэл өгөлгүй, хэвлэлд хаалттай байна.

Түүний хувьд хууч өвчин байхгүй, хамгийн сүүлд 2019 оны 4 дүгээр сард бүх төрлийн шинжилгээ оношлогоонд хамрагдаж, эрүүл мэндийн хувьд ямар нэг өвчингүй гэдэг нь нотлогдсон байсан юм.

Ардчилсан Намын Дэд дарга ажил үүргээ гүйцэтгэж явахдаа төрийн ордонд сэжигтэй байдлаар амь насаа алдсан шалтгааныг үнэн зөвөөр, нэн яаралтай тогтоож, учир шалтгааныг ард түмэнд нээлттэй мэдээлэхийг шаардаж байна.

Улаанбаатар хот

2019.5.18

АРДЧИЛСАН НАМ

УИХ-ын гишүүн асан, Ардчилсан намын дэд дарга Г.Батхүү 

Share