АНУ-ын Ерөнхийлөгчийн засаг захиргаа Америкийн виз хүсэгчдийн олон нийтийн сүлжээн дэх мэдээллийг судлахаар төлөвлөжээ. Хэрэв хэрэгжээд эхэлбэл Америкийн виз хүсэгчид олон нийтийн сүлжээн дэх мэдээллээ өгөх үүрэг хүлээх аж. Тодруулбал сүүлийн 5 жилд олон нийтийн сүлжээнд ямар аккаунттай байснаа мэдүүлэх юм.
Уг хяналтын програмын анхны хувилбар нь алдаа ихтэй, үүргээ хангалттай биелүүлж чадахгүй байгааг АНУ-ын Дотоодыг хамгаалах департмент мэдээлж байсан удаатай. Уг визний шинэ журам нь АНУ-ын Ерөнхийлөгч Дональд Трампын сонгуулийн сурталчилгааныхаа үеэр ярьж байсан цагаачдын эсрэг бодлого юм. Журам хэрэгжээд эхэлвэл Америкийн виз хүсэгч, визний шалгууруудыг хангасан байлаа ч нэмэлт хяналтад орох эсвэл татгалзсан хариу авах магадлалтай болж байна.
Төрийн департаментын энэ санаачлага нь харилцан визгүй зорчих гэрээг АНУ-тай байгуулсан улс орнуудад түүний дотор Их Британи, Канад, Франц, Герман улсуудад хамаарахгүй аж.