Загварын ертөнц Карл Лагерфельдийн араас гашуудаж буй энэ үед түүний тэжээвэр муур болон адисласан хүү нь алдарт дизайнерийн 200 сая ам.долларын хөрөнгийг өвлөж авах тухай сенсаци дэгджээ. 

Алдарт дизайнер Лагерфельд өчигдөр 85 насандаа Парисийн эмнэлэгт таалал төгссөнийг бид мэдээлсэн. Chanel брэндийг аварч, 30 гаруй жил тус брэндийн бүтээлч захирлаар ажилласан тэрээр загварын ертөнцийг орхин одсонд загварынхан болон дэлхий нийт гашуудаж байна. 

Түүний амьдралын сүүлийн жилүүдэд хань болж байсан Бирман гаралтай муураа дизайнер миний жинхэнэ хайр, хэрвээ хууль ёсоор гэрлэж болдог бол гэрлэх хүсэлтэйгээ өмнө нь илэрхийлж байсан аж. Дизайнерийн муур нь инстаграм хуудсанд өөрийн дагагчидтай ба 2.5 сая долларын хөрөнгөтэй гэнэ. 

Өнгөрсөн жил өгсөн ярилцлагынхаа үеэр Лагерфельд өөрийн хөрөнгийг хайртай муур Choupette болон адисласан хүү Хадсон Крүниг нар болон бусад тоо бүхий хүмүүст үлдээнэ хэмээн мэдэгджээ. Дизайнер өөрийн хүүхэд, ойрын садан төрөлгүй ба нэг эгчтэй гэх боловч холбоо тасраад удаж буй аж. 

Энэ талаараа дизайнер амьдралд хүмүүстэй харилцаа тогтоох нь “сонголт” болохоос “алба” биш хэмээн хэлж байжээ. Ямар ч байсан хуулиар амьтанд өв залгамжлахыг зөвшөөрдөг бол түүний муур энэ дэлхийн хамгийн баян муур болох магадлалтай байна.

Share